नेपालभाषाया न्ह्याम्हं च्वमि व भाषिक कार्यकर्तात नातिदाइ अर्थात नातिबज्र छक्वः नाप मलाःपिं म्हो हे जुइ । च्वमिपिनि  थः पिनिगु नातिदाइ व सफूधुकूया लुमन्तिइ

पिदन कि दकलय् न्हापां नातिबज्रया सफूधुकूतिइ मब्वः तलय् पिदंथें च्वनी मखु । नेवाः भाषिक कार्यकर्तापिं नं छुं नं छुं ज्याखँया नितिं अन छधू मवंसे ज्या हे क्वचाइमखु । अथे धइगु छुं नं संस्थाया ज्याझ्वः क्वःजी, पाहांपिं ब्वनेमाली । तर ब्वनापौ इनेत समस्या जुइ, उकिया समाधान लुइ नातिबज्रया सफूधुकू । उगु सफूधुकू ब्वनापौ कालबिलया छगू मू ज्याकुथि नं जुयाबी ।

छगू ई एफ.एम. रेडियो ज्याझ्वः तसकं लोकंह्वात । ज्याझ्वः न्ह्याकीपिं व न्यँमिपिनि दथुइ स्वापूया माध्यम जुइ व विषयया सम्बन्धित पौ । थजाःगु पौ न्यँमिपिन्सं ज्याझ्वः न्ह्याइगु एफ.एम.या ज्याकुथिइ थ्यंकेगु सहज मजुया बी । अलय् शरण वनेमाली व हे सफूधुकूतिइ । ज्याझ्वः न्ह्याकीपिन्सं थः न्यँमिपिनिगु पौ मुंवनेगु थाय् नं व हे जुइ ।