निगु करोड स्वया अप्वल कोरोना संक्रमितपि
लहनान्युज | गुंलागा ८ ११४०,साउन २७ मंगलवाः
हलियकं कोरोना भाइरस (कोभिड–१९) पाखे संक्रमित जुपिनिगु ल्याः निगु करोड स्वया अप्वःगु दु । जोन्स हप्किन्स युनिभर्सिटीया तथ्यांक कथं आः तक कोरोना भाइरसया संक्रमितपि निगु करोड ८९ हजार ६२४ म्ह थ्यःगु दु ।
कोरोना भाइरसं दकलय् अप्व कोरोना संक्रमित अमेरिकाय् पिहा वःगु दु । अमेरिकाय् कोरोना भाइरस संक्रमितपि ५० लाख स्वया अप्वःगु दु ।
वया लिपा ब्राजिलय् कोरोना भाइरस संक्रमितपि ३० लाख स्वया अप्वःगु दु । भारतय् कोरोना भाइरसं २२ लाख स्वया अप्व संक्रमित पिहा वःगु दु ।
विश्वभर कोरोना भाइरसया कारण सीप न्ह्यःगु लाख ३६ हजार १९१म्ह थ्यःगु दु ।
अमेरिकाय् दकलय् अप्व छगु लाख ६३ हजार स्वया अप्व कोरोना भाइरसया कारण सी धुकुगु दु सा ब्राजिलय् छगु लाख व द्धःछि स्वया अप्वः सी धुकुगु दु ।
आःतक हलियकं छगू करोड २२ लाख स्वया अप्व मनूत कोरोना संक्रमितपि वासः याका डिस्चार्ज जुइ धुकुगु दु ।
