निगूगु कासा नं त्याकूसें नेपालं टि–२० सिरिज त्याकल
लहना न्यूज | ने.सं. ११३९ दिल्लाथ्व त्रयोदसि (१४ जुलाइ, २०१९), आइतवाः
निगूगु टि–२०इ मलेसियायात ६गू रनं बुकूसें नेपालं सिरिज त्याकूगु दु ।
किनरारा ओभलय् नेपालं ब्यूगु १७४गू रनया लक्ष प्राप्त यायेगु झ्वलय् घरेलु टिमं २०गू ओभरय् ७गू विकेटया खतिइ मुक्कं १६७गू रन जक दयेकेफूगु खः ।
मलेसियां शुरुवात धाःसा बांलाक्क याःगु खः । ओपनर भीरनदीप सिंह व शेयद अजीजं न्हापांगु विकेटया नितिं ७५गू रनया साझेदारी याःगु खः । अजीजं ५०गू रन दयेकूगु इलय् सिंह २३गू रनय् आउट जूगु खः । थुगु साझेदारी त्वाःदलेधुंकाः मलेसिा दबाबय् लाःगु खः ।
नेपाःया सोमपाल कामी व सन्दीप लामिछानें २÷२गू विकेट काःगु खःसा करण केसी, अभिनाश बोहोरा व पारस खड्कां १÷१गू विकेट काल ।
थ्व स्वयां न्ह्यः टस त्याकाः ब्याटिङ याःगु नेपालं विनोद भण्डारीया अर्धशतकया ग्वाहालिइ २०गू ओभरय् ६गू विकेटया खतिइ १७३गू रन दयेकूगु खः ।
नेपाःया शुरुवात औसत जुल । ओपनर पारस खड्का व पवन सर्राफं ३४गू रनया साझेदारी याःगु खः । पवन मुक्कं १०गू रनय् आउट जुल । व लिपा नेपालं ज्ञानेन्द्र मल्ल व पारसया विकेट तंकल । मल्ल ७गू व खड्का २३गू रनय् आउट जुल ।
रोहितकुमार पौडेल व शरद भेषवाकरं प्यंगूगु विकेटया नितिं ४६गू रनया साझेदारी यात । रोहित १९गू व शरद ४०गू रनय् आउट जुल ।
खुगूगु ल्याखय् वःम्ह विनोद भण्डारीं विष्फोटक ब्याटिङ यासें अर्धशतक दयेकल । भण्डारीं २५गू बलय् ३गू चौका व ५गू छक्काया ग्वाहालिइ ५१गू रन दयेकूगु खः । करण केसीं १६गू रन दयेकल ।
टि–२० सिरिज अन्तर्गत मलेसिया विरुद्ध म्हिगः सञ्चरवाः जूगु न्हापांगु कासाय् नेपाः ७गू विकेटं त्याःगु खः ।
Categorized in कासा
