निम्ह गुरुपिन्त हन
नृपेन्द्रलाल श्रेष्ठ | चौलागा सप्तमी (अप्रिल ७ २०१८)
ज्यापु कल्याणकारी कोषया ग्वसालय् वंगु थौं शनिवाः परम्परागत त्वाःया गुरुपिं हनेगु झ्वलय् मूगुरुपिं असं त्वाःया कृष्णबहादुर महर्जन व ब्रम्हत्वाः नःबहाः, दगू दाफा खलःया मचाभाइ डंगोलयात ज्याझ्वःया मूपाहाँ येँँ मनपाया मेयर बिद्यासुन्दर शाक्यं हनादीगु दु ।
उगु ज्याझ्वलय् गुरुपिन्त ‘रत्न–आशा गुरु सिरपां’ नाप नगद १५००० तका लःल्हाना सम्मान यायेगु खः ।
पुख्र्योली पेशा बुँज्यां विमुख जुया वनेधुंकुपिं ज्यापु समुदायया भाषा, संस्कृतिया उत्थान यानाच्वनादिइपिं गुरुपिंन्त प्रोत्साहन विया सामाजिक ज्या याना वनेगु तातुना नीस्वंगु ज्यापु कल्याणकारी कोषया वार्षिक ज्याझ्वलय् थथे हनेगु ज्याःयाःगु खः ।
समुदायया निंतिं समर्पित जुयाः भाषिक सांस्कृतिक उत्थानया ज्याय् निरन्तर योगदान यानादिइपिं परम्परागत त्वाःया गुरुपिं मध्ये हरेक दँय् निम्ह गुरु हनेगु ज्याझ्वः दुगु व मेगु दँय् स्वंगु थप ज्याझ्वः हयेगु ग्वसाःदुगु कोषया छ्याञ्जे बाबुराजा महर्जननं जानकारी वियादिल ।
येँय् मनपाया मेयर विद्यासुन्दर शाक्यं गुरुपिन्त कदर पत्रविसें सम्मानयात धेवाय् तुलना यायेमज्यु धयादिसें स्थानिय सरकार वयेधुंका भाषा, संस्कृति व तजिलजिया ज्याय् महानगरपालिकां जोडविया वनेगु वचंविसें स्थानिय जनसमुदाय नं थुगु विषयस ध्यानतया वंगु खँय् थः लयेतानागु खँ कनादिल ।
मदुपिं रत्नमाया महर्जन व आशाकाजी महर्जनया नीगु लखं न्ह्यागु थुगु कोषं निम्ह गुरुपिन्त हना वया च्वंगु खःसा आ रत्न—आशा मय्जु सिरपा व छगु खलः पुचःयात रत्न—आशा खलः सिरपा बिइगु न ग्वसाः ग्वया तःगु दु ।
