निल शाक्ययात छगू लख तकानाप संगीत साधन सम्मान ११४६
सुरज, लहनान्युज | दिल्लाथ्व अष्टमी ११४६, सावन ५ शुक्रवाः
प्रतिभा सेवा समाजं सांगीतिक ज्याझ्वः “एन इभिनिङ विथ लेजेन्डरी म्यूजिसियन निल शाक्य” ग्वसाः ग्वसें संगीतकःमि निल शाक्ययात संगीत साधक सम्मान ११४६ देछाना हंगु दु । अपटाउन झम्सिखेलय् जूगु थुगु ज्याझ्वलय् सम्माननापं छगू लख तका नं देछाःगु खः ।
सम्मानया झ्वलय् प्रतिभा सेवा समाजया नायः सुरेन्द्र तुलाधरं स्वांमाः क्वखायेकाः दिलसा समाजया न्वकू गोपालकृष्ण महर्जनं ढाका तपुलिं पुइकादिल । समाजया छ्याञ्जे रूमण जोशीं खादा क्वखायेकादीगु हना ज्याझ्वलय् मूपाहाँ येँ महानगरपालिका १९ वडा अध्यक्ष राजेश श्रेष्ठं सम्मान पत्र व १ लखया चेक बोर्ड देछानादिल । समाजया दांभरिं सुधा शाक्यं १ लाखया चेक देछानादीगु थुगु ज्याझ्वःया बिशिष्ट पाहां यल महानगरपालिका १६ वडाया नायः निर्मलरत्न शाक्यं दोसल्ला न्ययेकादीगु खःसा बिशिष्ट पाहापिं यल महानगरपालिका ११ वडा अध्यक्ष अरोज कुमार खड्गी व येँ महानगरपालिका २० वडाया नायः राजेन्द्र मानन्धरं नं खादा क्वखायेकाः हनादीगु खः ।
हनाज्या क्वचायेका थःगु नुगःखँ तयेगु झ्वलय् संगीत साधक निल शाक्यं लसता प्वंकूसें नेपालभाषा संगीत ख्यःया नितिं अझ धिसि धायेक न्ह्यज्यायेत हःपा चूलाःगु खँ न्ह्यथनादिल ।
संगीतकःमिनाप संकिपाकःमि अमर चित्रकारया ए.एम. क्रियाशन नेपालं दयेकूगु निल शाक्यया बायोग्राफी न्ह्यब्वःसें न्ह्याःगु ज्याझ्वलय् संगीतकार शाक्यया लोकंह्वाःगु १३ पु म्ये वयकःनाप थीथी कलाकारपिन्सं न्ह्यब्वयादीगु खः ।
निल शाक्यया च्वसाय् इन्द्र ब्यञ्जनकारया लसय् “मतिनाया अन्ति” म्येचाकलय् दुथ्याःगु नेपालभाषाया अतिकं लोकंह्वाःगु म्ये “स्वयगु मन जुल रे” न्ह्यब्वयादीम्ह सरीता शाहीं सुरेन्द्र तुलाधरया च्वसाय्, निल शाक्यया हे संगीत व भूपेन्द्र बज्राचार्यया संगीत संयोजनय् “नकतिनि नापलाःम्ह” म्ये न्ह्यब्वयादीगु खः । भाजु शाक्यं थःगु हे संगीत, म्येग्वलय् “थ्व फसय्”, “सुलिं मय्जु” रेखा शाक्य व दिपक बज्राचार्यं च्वयादीगु “अय्ला अय्ला”, वंशीधर बज्राचार्यं च्वयादीगु ज्वःम्ये “बागलाया स्वां” कविता जोशीनाप न्ह्यब्वयादिलसा निर्मलरत्न शाक्यं च्वयादीगु ज्वःम्ये “जिगु लसता छ हे” लसता जोशीनाप न्ह्यब्वयादिल । ज्याझ्वलय् एञ्जिला सिँह श्रेष्ठं महेशमान लँजुवां च्वयादीगु “यौवन जिगु जायावःथें” व सुरेन्द्र तुलाधरं च्वयादीगु आस्कुति संकिपाया ज्वःम्ये “माया जालं क्यंकाः” सतिष महर्जननाप न्ह्यब्वयादीगु खः । उदीत नारायण व दीपा नारायणया सलय् लोकंह्वाःगु म्ये “माया रत्न” रोविनशन कंसाकार व शुद्धलक्ष्मी श्रेष्ठया सलय् थ्वःगु थुगु ज्याझ्वलय् मोहन शाक्य व रोजी डंगोल श्रेष्ठं निल शाक्यया च्वसां पिज्वःगु “सरी धैब्यु” म्ये न्ह्यब्वयादीगु खः । वयकःया हे च्वसां पिज्वःगु लोकंह्वाःगु म्ये “जिगु वैशं धाल” देविका वन्दना व राजेश महर्जनया सलय् थ्वलसा थुगु ज्याझ्वलय् सुरेन्द्र तुलाधरं थःगु हे च्वसाय् निल शाक्यया संगीतय् “आ..आ..आ..” म्ये न्यंकादीगु खः ।
थ्यंमथ्यं ३५ दँ न्ह्यः पिदंगु “स्वयेगु मन जुल रे” च्वयाः नेपालभाषा संगीत ख्यलय् पिलुवःम्ह संगीतकःमि निल शाक्यया म्येहालामिया म्हसीका ब्वःगु म्ये “गल्ली दुने चिधंगु गल्ली” खःसा संगीतकारकथं म्हसीका ब्वःगु म्ये पवित्र कसाःया सलय् थ्वःगु “तिकिझ्याः प्वालं जः ज्वयाः वःथें” खः ।
वयकःया याकः संगीत व सलय् पिदंगु न्हापांगु म्येचाः “जिलिसे छझाः” खः । वयकलं संगीत तयादीगु म्ये ७५ पु, वयकःया सलय् थ्वःगु म्ये १५ पु, च्वयादीगु ४० पुं मल्याक नेपालभाषा संगीत ख्यलय् थ्वयाच्वंगु दु । वयकलं च्वयादीगु म्ये दुथ्याःगु खस नेपाली भायया म्येचाः “तिम्रो हेराई” व “ओझेल” खः । वयकलं “मिस्टर फन्टुस” नेपाली टेलिप्याखनय् नं संगीत बियादीगु दु ।
सुर्यनाथ शर्माया निर्देशनय् प्रज्ञा भवनय् न्ह्यब्वःगु 'लकसं पिब्वःगु' नाटकं अभिनय ख्यलय् पलाः तयादीम्ह वयकःया “ससःया पसः” नं अतिकं लोकंह्वाःगु ख्यालः खः । थ्यंमथ्यं झिंछद्वः श्रृंखला प्रशारण जूगु टेलिप्याखं “ख्वताबजि’, ऐतिहासिक नाटक 'विरह राग', 'कपिलवस्तु भगवान', संकिपा 'पानवती', 'पताचारा', 'लय्', 'धौबजि', 'हिसिमदु' प्याखंपाखें नं थःगु अभिनय कला न्ह्यब्वयादीम्ह वयकः आदिवासी जनजाति मातृभाषा विधाय् राष्ट्रिय चलचित्र पुरस्कार २०८२ त्याकेतः ताःलाःगु 'ईन्दिरा धिमेमैंचा' संकिपाया संगीतकार नं खः । वयकलं 'स्वयगु मन जुल रे' म्येपाखें न्यू ट्यालेन्ट बेस्ट लिरिक्स, २५ दँ संगीत ख्यलय् योगदान याःगुया कदर यासें लायकू राजभाई सिरपाः, नेपालभाषा स्टार म्यूजिक भिडियो अवार्डय् दकले बांलाम्ह संगीतकारका सिरपा त्याकादीधुंकूगु दु । वयकः यल महानगरपालिका १६ वडा कलाकार समितिया दुजः नं खः ।
