नेकपाया मुँज्या च्वनेत्यःगु दु
लहानान्युज | थिंलाथ्व द्धितीया ११४१, पुस १ गते
नेपाल कम्युनिष्ट पार्टी नेकपाया स्थायी कमिटी मुँज्या थौं च्वनेत्यंगु दु । आइतबाः च्वंगु मुँज्या शोक प्रस्ताव पारित यासें थौं तक्कया लागिं स्थगित जूगु खः ।
प्रधानमन्त्री अले पार्टीया अधक्ष्य केपी शर्मा ओलीं पार्टीइ छुं हे सहलह मयाःसे संवैधानिक परिषद् सम्बन्धी अध्यादेश हयेधुंकाः नेकपा दुने हे तरंग ब्वलंगु दु । प्रधानमन्त्री ओलीं म्हिगः संवैधानिक परिषद सम्बन्धी अध्यादेश हयेधुंकाः कार्यकारी नायः पुष्पकमल दाहाल लिसें सचिवालयया बहुमत दुजःत असन्तुष्ट जूगु दु ।
ओलीं पार्टीइ सहलह हे मयाःसे हःगु अध्यादेश लित कायेमाःगु उमिगु माग दु । अध्यादेश जारी जुयाकथं असन्तुष्ट स्थायी कमिटीया बहुमत दुजः म्हिगः दाहाल निवास खुमलटारय् मुंगु खः । उमिसं थौं च्वनीगु मुँज्याय् प्रधानमन्त्री ओलीयात अध्यादेश लित कायेत निर्देशन बीगु लिच्वः पिकाःगु खः ।
पार्टी दुने खनेदुगु अन्तरविरोध व थुकिं ब्वंगु समस्या समाधानय् केन्द्रित जुइगु इलय् प्रधानमन्त्रीं अध्यादेश हयेधुंकाः नेकपा दुनेया विवाद झन तच्वःगु दु।
Categorized in राजनीति
