नेकपा सांसद मानन्धरपाखें सञ्चारमन्त्रीया राजीनामा फ्वन
लहनान्युज | ने.सं. ११३९ तछलाथ्व त्रयोदशि (१८ जुन, २०१९), सञ्चरवाः
सत्तारूढ नेकपाका सांसद रामवीर मानन्धरं गुथि प्रथायात सामन्तवाद धयादीगुलिं सरकारया प्रवक्ता नापं सञ्चार मन्त्री गोकुल बास्कोटया राजीनामा फ्वनादीगु दु ।
रिपोर्टस् क्लबपाखें ग्वसाः ग्वःगु साक्षात्कार ज्याझ्वलय् न्ववानादिसें नेकपाया सांसद मानन्धरं उकथं राजीनामा फ्वनादीगु खः ।
गुथियात सामन्ती प्रथालिसे स्वाःगुलिं कडा आपत्ति प्वंकादिसें वय्कलं धयादिल, ‘सरकार प्रवक्ताकथं गुकियात सामन्ती धयादीगु दु, उकियात लित कयादिसँ, मखुसा राजीनामा बियादिसँ ।’ सतकय् कुहांवःपिं जनतायात सान्त्वना बीमाःगुली सरकारया प्रवक्तां हे च्यानाच्वंगु मिइ घ्यः तयेगु ज्या यानादीगु वय्कःया द्वपं खः ।
नेकपाया सांसद मानन्धरं प्रधानमन्त्री केपी शर्मा ओली नेपाः लिहां वयेधुंकाः विधेयक लित कायेगु निर्णय मयाःसा स्वनिगलय् आन्दोलनया ग्वःफय् वइगु ख्याच्वः तकं बियादिल । थः पूर्खा व अजापिन्सं गुथिपाखें संरक्षण यानातःगु सम्पत्तियात सरकारं न्हंकेत स्वःगु नं द्वपं बियादिल ।
ज्याझ्वलय् नेपाली कांग्रेसया सांसद भीमसेनदास प्रधानं गुथि विधेयक लित मकाःतलय् संसद न्ह्याके मबीगु धयादिल । सञ्चारमन्त्री बास्कोटा धर्म व संस्कृतियात कयाः अनभिज्ञ जूगु दुर्भाग्य खः धयादिल ।
थ्व हे झ्वलय् पशुपति क्षेत्र विकास कोषया पुलांम्ह सदस्य–सचिव गोविन्द टण्डनं नं सरकारं हःगु गुथि विधेयकं संस्कृतिया हस्तक्षेप यायेत स्वःगु द्वपं बियादिल । वय्कलं गुथि धइगु झी पूर्वजपिन्सं गुथ्याःपिन्त संरक्षण याः धकाः बियातःगु सम्पत्ति जूगु धयादिल ।
Categorized in राष्ट्रिय
