नेपाःया सरकारं विदेशीयात सःताः संविधानया विषययात कयाः सहलह याःगु नेपाःमितयगु अपमान जूगु मू विपक्षी दलया नेतां द्वपं ब्यूगु दु ।

नेकपा एमालेया न्वकू भीम रावलं सार्वभौम संविधानसभापाखें जारी जूगु संविधानयात कयाः गबलें विदेशया राजधानीइ, गबलें विदेशी नेतायात सःताः सहलह याःगु द्वपं बियादिल । थुकिं नेपाःमितयगु अपमान जूगु वयकःया धापू खः ।

उप–प्रधानमन्त्री तकं जुयादीधुंकूम्ह एमाले नेता रावलं संविधान संशोधन यायेगु वा मयायेगु विषय आन्तरिक मामिला जूगुलिं विदेशीयात सःताः सहलह यायेगु गलत जूगु नं धयादिल । थःपिन्सं हे अभिनन्दन याःगु सार्वजनिक ज्याझ्वलय् भारतीय राष्ट्रपति प्रणव मुखर्जीं संविधान कार्यान्वयन यायेत फुक्क पक्षयात दुथ्याकाः यंकेत सुझाव ब्यूसां नं छुं नं प्रतिकृया मब्यूसे हिनतावोध क्यंगु वयकःया द्वपं खः ।

वयकलं जःलाखःला देशया पाहांयात सम्मान यायेगु त्वहःचिनाः स्वदेश व कुटनीतिक नियोगय् तकं विदा बीगु कुटनीतिक अभ्यास व मर्यादा अःखः जूगु नं धयादीगु दु ।

Categorized in राजनीति