नेपाःया दिगो विकास व आर्थिक समृद्धी हे जिगु आज्जु
थिंलाथ्व सप्तमि ११३७ (नोभेम्बर २५ २०१७)
नेकपा (एमाले) आः स्थीर सरकार व उगु सरकारपाखें देयया विकासया एजेण्डा लिसें चुनावी ख्यलय् कुहांवःगु दु । लोकतन्त्रया आधार, सुशासन व समृद्धिया लागिं बामपन्थी सरकार’ धइगु नारालिसें बाम गठबन्धनपाखेंया उम्मेदवारत चुनावी प्रचार अभियानय् व्यस्त जुयाच्वंगु दु । व हे झ्वलय् प्रदेश सभाया निर्वाचनय् बाम गठबन्धनपाखें येँया क्षेत्र नम्बर ९ ‘क’ या नितिं एमाले पार्टिपाखें सुर्द्यः चिं कयाः थःगु उम्मेदवारी बियादीम्ह डा.अजयक्रान्ति शाक्य नं सुथंनिसें बहनीतक्क थःगु क्षेत्रया मतदातापिनिगु छेँय् छेँय् वनाः सकसिगु समस्या, कुंखिना न्यनेगुलिइ व्यस्त दु । नेवाः संगीत ख्यलय् संगीतकारया रुपय् नं नांजाःम्ह संगीतकःमि लिसें समाजसेवी डा. अजयक्रान्ति शाक्यलिसेया खँल्हाबल्हा न्ह्यब्वयाच्वना ।
जनताया छेँय् वनाः छिं प्रत्यक्ष खँ ल्हानाबलय् गुकथंया प्रतिक्रिया वयाच्वंगु दु ?
जिपिं गन गन नं थ्यंगु दु, अनया जनता तसकं हे उत्साहित खनेदु । विकास, देय् निर्माण्या नितिं बः कायेबहःगु पार्टी एमाले खःगु धासें उत्साह क्यनाच्वंगु अवस्था दु । लिपांगु इलय् वयाः वाम शक्तितयगु चुनावी तालमेल व वाम एकतातक्कया कुतःयात जनतां दुनुगलंनिसें हे समर्थन याःगु नं जिं खंकागु दु । वामपन्थीयात न्यादँ सरकार न्ह्याकेबीमाः धइगु मनोभावना नं जनतायाके खनागु दु ।
छि ला एमाले जक मखु, वाम गठबन्धनया नं मंकाः उम्मेदवार खः । माओवादी समर्थक मतदातापाखें गज्याःगु प्रतिक्रिया खंकादिया ले ?
पक्कां हे खः, जि वाम गठबन्धनया येँ क्षेत्र नम्बर–९ क या मंकाः उम्मेदवार खः । अथे जुयाः जिं माओवादि केन्द्रलिसे जानाः मंकाः कार्यकर्ता मुना यायेगु, वय्कःपिंलिसे सल्लाह–सुझाव कायेगु ज्यायात नं प्राथमिकताय् तयागु दु । माओवादी केन्द्रया पासापिंलिसे नं जि निरन्तर स्वापुतिइ च्वंच्वनागु दु । वय्कःपिं नं तसकं हे उत्साहित जुयाच्वंगु जिं खनागु दु ।
थुगु क्षेत्रया जनता आः देशय् आपाः मखु, म्ह्वः जक पार्टी जुइमाः व देयया समृद्धिया लागिं स्थायी सरकार जुइमा धइगु मनंतुनाच्वंगु दु । थुगु स्थायी सरकार वामपन्थीया हे जुइमा धइगु एमाले व माओवादि समर्थक जक मखु, आम सर्वसाधारण जनताया हे मनंतुना खः ।
वामपन्थीयागु हे सरकार जुइमा धइगु जनतां छाय् मनंतुंगु जुइले सा ?
देशय् तारन्ताः सरकार हिलाच्वनीगु व उकिं यानाः देशया विकास प्रभावित जूगु अवस्थाय् स्थीर सरकारया मनंतुना जनतायाके दुगु जुल । व स्थीर सरकार आः वाम गठवन्धनपाखें जक हे निर्माण जुइगु खँय् जनता विश्वस्त दु । आः आर्थिक, राजनीतिक सामाजिक ख्यलय् जक मखु, सकभनं अस्तव्यत जुयाच्वंगु इलय् आः राजनीतिक ध्रुवीकरणया हुनिं वाम गठबन्धनया सरकारं छुं याइ धइगु आशा थुगु क्षेत्रया जनतां याःगु खः ।
छि ला राजनीतिक स्वयां बौद्धिक ख्यलय् आपाः सक्रिय मनू, चुनावी अभियानय् गुकथंया महशुस जुयाच्वंगु दु ?
जिं भूगोलया प्रत्यक्ष जिम्मा कयाः जक ज्या मयानागु खः । तर, जि ला २०४६ सालं निसें हे राजनीतिइ सक्रिय दु । पार्टीया थीथी जिम्मेवारीइ ज्या यायेधुनागु नातां जितः छुं हे मछिं महशुस जूगु मदु । राजनीतिक व बौद्धिक क्षेत्रया नापं सामाजिक क्षेत्रय् आवद्ध जुयाः नं थुगु क्षेत्रया लागिं यक्व ज्या यानागु दु । थुगु क्षेत्रया जनताया लागिं नं जि न्हूम्ह मनू मखु । जि न्ह्याब्लें थ्व हे क्षेत्रया जनतालिसे हे च्वंच्वनागु दु । अथेजुयाः जिगु उम्मेदवारीं नं जनता उत्साहित हे जुयाच्वंगु दु ।
छिं छु एजेण्डा ज्वनाः झायागु दु ?
जिं न्हापा यानागु ज्याया समिक्षा हे जिगु न्हापांगु एजेण्डा खः । जिं न्हापांनिसें थुगु क्षेत्रया लागिं त्वनेगु लःया समस्या, विजुलीया समस्या, धःया समस्या, सडक, लँया समस्याया बारे जिं थनया स्थानीयलिसे सहलह यायेगु, समाधान यायेगु कुतः याना वयाच्वनागु दु । गुलिखे थाय्या मतदातां १५दँ–२०दँतक्क जनप्रतिनिधि मदयाच्वंगु अवस्थाय् आः जनप्रतिनिधि वःगु महसूस जुल धकाः लय्ताःगु दु ।
मेगु मुख्य एजेन्डा धयागु समृद्धि हे खः । आर्थिक रुपान्तरण व दीगो विकासया लागिं नं वामपन्थीया सरकार माः धइगुलिइ मतदाता नं ढुक्क दु । दक्ष जनशक्ति, संगठन, मिसन व भिजन दुगु वामशक्तियात त्याकेगु हे आःया आवश्यकता खः धइगु बांलाक थूपिं थुगु क्षेत्रया जनतां स्थानीय निर्वाचनय् नं एमालेयात हे ल्यःगु खः । केपी ओली प्रधानमन्त्री जूबलय् वय्कःया सल्लाहकारया रुपं ज्या यायेगु व्हःताः चूलात । उकिं नं जितः समृद्धिया लागिं यक्व हे योजना दयेकेगु व्हःताः चूलात । आः व हे ज्ञानयात थुगु क्षेत्र व मुक्कं देयया आर्थिक समृद्धिया स्पष्ट योजना कथं ज्वनाः मतदाताया छेँखा छेँखाय् वनाच्वनागु दु ।
छि त्याइगु आधार छु छु दु ?
जि थ्व हे क्षेत्रय् बुल, ब्वलन । थनया जनतां जितः बांलाक हे म्हस्यू । जिगु दक्कले न्हापांगु आधार ला थ्व हे खत । राजनीतिलिसें जिं यक्व हे सामाजिक ज्यायात नं निरन्तरता बियाच्वनागु दु । थनया जनताया समस्या समाधानया लागिं जिं न्ह्याब्लें फक्व कुतः याना हे वयाच्वनागु दु । जिगु ज्याया मूल्याङ्कन ला जनतां न्हापानिसें हे याना वयाच्वंगु हे दु । जि त्याइगु मेगु आधार थ्व हे जुल ।
न्हापा जिपिं ब्यागः ब्यागः चुनावय् ल्वानागु इलय् हे ला चीधंगु मत अन्तरं जक बूगु थुगु क्षेत्रय् आः निगुलिं कम्युनिष्ट पार्टी छधी जूगु अवस्थाय् नं त्याकेत अःपूगु हे दु धायेमाल । जिं मेपिनिगु आलोचना यायेगु अथवा कुंखिनेगु ज्या यायेमखु । जिगु पृष्ठभूमि, जिं न्हापांनिसें बिया वयाच्वनागु योगदान, संगठनया अवस्था, मतदातां जिप्रति क्यंगु उत्साह, मतिना आदिया हुनिं नं थुगु क्षेत्रय् त्याइम्ह उम्मेदवार जि हे खः ।
