नेपाः श्रीलंका दथुया दौत्य सम्बन्ध ६०दँ क्यन
राजेश बज्राचार्य | ने. सं. ११३८ पोहेलाथ्व पारु (डिसेम्वर २०, २०१७) यल
नेपाः व श्रीलंकाया औपचारिक मैत्रीय सम्बन्ध सहकार्य ६०दँ क्यंगु लसताय् मंगलवाः होटल हिमालय छगू ऐतिहासिक ज्याझ्वः जूगु दु ।
समारोहया वक्तापिन्सं निगू देय दथुया धार्मिक, सांस्कृतिक सम्बन्धया आधारय् आर्थिक विकासयालागि ज्याझ्वःत नं दयेकेफूगुलिइ बः बियादीगु दु ।
नेपाःया लागि श्रीलंकाया राजदूत डब्लु एस परेरां न्हापां नेपाःपाखें तब्यानावंगु बुद्ध धर्मपाखें श्रीलकाया सभ्यता, संस्कृति व जीवनशैली निर्माण यायेत तधंगु भूमिका म्हितुगु स्मरणयासें बौद्ध धर्मं प्रेरित जुवंगु सम्बन्ध आः आर्थिक विकासया नितिं पर्यटकीय प्रवद्र्धन, गरिबी निवारणपाखे नं सहकार्य याना वनेमाःगुलिइ बः बियादिल । वयेकलं निगू देय् दथुया जनताया आकांक्षा तकं समान जूुुगु हुनिं लुम्बिनी विश्व शान्तिया केन्द्र स्थापित याना पर्यटकीय विकासया नितिं सहकार्यया सम्भावना दूगुपाखे ध्यानाकर्षण यानादिल ।
‘नेपाः व श्रीलंका दथुइ सम्बन्धया मू आधार धैगु बुद्धधर्म हे खः । श्रीलंकाया जनता नेपाःयात छगू बिस्कंया महत्व दूगु दय्कथं नालाकाई । थःगु जीवनय् छक्वः जक जुसां भगवान बुद्धया जन्म जूगु थाय् नेपालय् थ्यंके खनेवं श्रीलंकालीतयेसं गर्व तायेकीइ।’ राजदूत परेरां धैदिल । वयेकलं श्रीलंका सरकारपाखें न्हापांनिसें लुम्बिनीया विकास, संरक्षण व सम्बर्धनय अग्रसर जुइगुनिसें लुम्बिनीइ श्रीलंकाली विहार व धर्मशाला दयेकेखना तसंक लसताया विषय जूगु स्मरण यानादिल ।
समारोहसं परराष्ट सचिव शंकर बैरागीें श्रीलंकालिसेया औपचारिक सरकारी सम्बन्ध ६० दँ पुलाँगु खःसातवि जनस्तरदथुया सम्बन्ध अझ पुलाँगु धैदिसें सहकार्यपाखें समृद्धिया लँपुइ न्ह्यज्यायेत तत्पर दूगु खँ न्ह्यथनादिल । अथेहे, ललितपुर महानगरपालिकाया प्रमुख चिरिबाबु महर्जनं तःभूखाचंं क्षतविक्षत जूगु सम्पदामध्ये बुंगमति लगायतया बौद्ध महत्वया देगः निर्माणय् श्रीलंकाया ग्वाहालियात च्वछानादिल । राजा महेन्द्रपाखें सन् १९५७सं दौत्य सम्बन्ध कायम याःगु खःसां तवि बुद्ध धर्म संस्कृति धैगु मैत्री सम्बन्धया धिसिलाःगु आधार जूगु चर्चा बौद्ध विहार संघ यलया नायः पुष्परत्न शाक्यं यानादिल ।
समारोहसं नेपाल भिक्षु महासंघया नायः भिक्षु मैत्रीं श्रीलंकाली जनता भगवान बुद्ध थःगु जीवनकालय् ३क्वःतक श्रीलंकाय् भ्रमण याःगु खँय् विश्वास याइगु कनेदयेवं हे सुखद अनुभूति याइगु खँ न्ह्यथनादिल । वयेकलं श्रीलंकापाखें नेपाःया थेरवाद बुद्धधर्मयात पुनर्जागरण चरणय् हयेत भूमिका म्हितेखंगुलिइ नं आनन्दित जुइगु न्ह्यथनादिल । ‘नेपाःयात श्रीलंकाली जनतां थपिनिगु देय्पाखें २५सः दँ तक सुरक्षित यानातःगु भगवान बुद्धया अस्तिधातु उपहार बिया नेपाःप्रति मेगु तधंगु गुण याःगु दु ।’ वयेकलं धयादिल ।
सम्राट अशोकं काय् महिन्द्र व म्ह्याय् संघमित्रायात श्रीलंका छ्वया बुद्ध धर्म प्रचार प्रसार याकूगु खःसा थौकन्हेतकं बुद्धधर्म श्रीलंकाय् विकसित जुयाच्वंगु दु । सन् १९४०या दशकय् नेपाःया बौद्ध भिक्षुपिनित धर्म प्रचारया द्वपं बिया देशनिकाला यायेधुंका श्रीलंकाया भिक्षुपिनिगु नेतृत्वया प्रतिनिधिमण्डलपाखें तत्कालिन नेपाः सरकारयात नापलाना थुपिं भिक्षुपिन्त नेपाः लिहाँवयेगु वातावरण दयेका ब्यूगु इतिहास दु ।
लुम्बिनी बौद्ध विश्वविद्यालयया उपकुलपति प्रा डा नरेशमान वज्राचार्यं श्रीलंकाय् यक्वः न्हापांनिसें बुद्धधर्मया प्राज्ञिक अध्ययन अध्यापन यायेगु परम्परा दुगुलिं नेपाः लगायतया देयया द्वलंद्व श्रामणेरपिं बुद्धधर्म व दर्शनया अध्ययन यायेत थन वनीगु धयादिल । लुम्बिनी बौद्ध विश्वविद्यालय न्ह्याकूगु थीथी शैक्षिक कार्यक्रमबारे धैदिसें वयेकलं विचाः मिलेजूपिंनापं नेपाःया बौद्ध विश्वविद्यालयस्तरय् विशेष सम्बन्ध दयेका ब्वनामिंपिनिगु आदान प्रदान लगायतया सहकार्यया सम्भावनापाखे ध्यानाकर्षण याकादिल ।
नेपालय्च्वंगु श्रीलंकाया राजदूतावासपाखें बौद्ध विहार संघ यललिसे सहकार्य याना मंगलबाः थुगु समारोहया ग्वःसा ग्वःगु खः । नेपाःया सम्माननीय उपराष्ट्रपति नन्द बहादुर पुनया मू पाहाँसूइ जूगु थुगु समारोहसं नेपाःया चर्यानृत्य व श्रीलंकाली कलाकारपिंपाखें हुलाप्याखं नं न्ह्यब्वःगु खः ।
