नेपालं एशिया कपय् म्हितेखन
लहनान्यूज सम्वाददाता | कौलाथ्व चतुर्दशि ११३६ (अक्टोबर १५ २०१६)
नेपाल एसिया कपया ल्यज्याय् लाःगु दु ।
आइसीसी मिसा विश्वकप २०१७ या एसियाली ल्यज्याय् सन्चरबाः थाइलाय्न्डं हङकङयात बुकेधुंकाः नेपाली राष्ट्रिय महिला क्रिकेट टिमया नितिं एसिया कपया खापा चाःगु खः । सन्चरबाः हे जूगु न्हापांगु कासाय् नेपालं चीनयात ४ विकेटं बुकाः ल्याः मुंकेत ताःलाःगु खः ।
थाइल्यान्ड १० ल्याःलिसें एसियाली ल्यज्या पुचलय् न्हापांगु थाय् कयाः कोलम्बोय् जुइगु ग्लोबल क्वालिफायरया ल्यज्याय् लाःगु खःसा नेपालं ३ कासाय् त्यानाः अले ३ बुनाः ६ ल्याः मुंकाः ल्यू लाःगु खः ।
सन्चरबाः जूगु हङकङ व थाइलाय्न्ड दथुइया कासाय् थाइलाय्न्डं ग्वसाः खलः देय् हङकङयात ७ विकेटं बुकल । थुगु कासाय् हङकङ त्याःगु जूसा एसिया कप म्हितीगु पुचः रनरेटया लिधंसाय् ल्ययेमालीगु खः ।
एसिया कप वइगु नोभेम्बर व डिसेमबरय् थाइल्यान्डय् जुइ । उकी टेष्ट म्हितीगु भारत, पाकिस्तान, श्रीलंका व बंगलादेशलिसें ग्वसाः खलः देयया रुपं थाइलाय्न्ड तप्यंक हे दुहांवंगु दु ।
Categorized in कासा