नेपालभाषाया सामाजिक सञ्जाल नातिबज्रया सफूधुकू
मीना बज्राचार्य
वि.सं. १९९५साल असार १ गते अबु दानरत्न बज्राचार्य व मां मानकुमारी बज्राचार्यया कोखं जन्म जुयादीम्ह भाषासेवी साहित्यकार नातिबज्र बज्राचार्य वि.सं.२०७५ पुषया १८ गते बहनि बुधवाः थ्व अनित्य संसारपाखें बिदा कयादिल । वय्कःया भौतिक शरीर झी दथुइ मदुसां वय्कःया कृतित्व व व्यक्तित्व झी दथुइ सदां म्वानाच्वनी ।
नातिबज्र बज्राचार्यया सफूधुकू धइगु नेपालभाषाया नितिं छगू सञ्जाल खः। छाय्धाःसा थौंकन्हय् सामाजिक सञ्जालं याइगु ज्या गथे कि मोबाइल, फेसबुक अलय् इन्टरनेटपाखें गुकथं सूचं प्रवाह यानाः ज्या यानाच्वंगु दु, वहे कथं न्हापा थजाःगु प्रविधिया उलि विकास मजूनि बलय् नातिबज्रया सफूधुकू पसलं यानाच्वंगु खँ थन थाय् झीसं लुमंके हे माः । भोताहितिं दगु बहालय् दुहाँ वनेगु लुखाय् लाक्क चीचा धंगु थासय् नेपालभाषाया पत्रपत्रिका व सफूत ब्वयाः पसलय् न्ह्याबलें न्हिला ख्वाः वय्का च्वनादी ।
उगु पसलय् नेपालभाषाया सफू वा पत्रपत्रिका न्याय् धकाः वइपिं सुं नं गाहाकी निराश जुयाः लिहाँ वनेमाली मखु । नेपालभाषां पिदंगु न्ह्याग्गु सफू थजुइमा, पत्रपत्रिका, सिडि, नगुमां जुइमा, सफू धुकूतिइ मदइ मखु । अथेहे नेपालभाषाया न्ह्याथेंजाःगु ज्याझ्वः छाय् मजुइमा, नातिबज्र सफू धुकूपाखें जानकारी कालबिल मजुइक पूवनी मखु । छाय् धाःसा नेपालभाषाया हरेक पत्रपत्रिका, सफू अलय् ज्याझ्वःया बारे पौ वा ब्वनापौ कालबिल जुइगु भोताहितिया नातिबज्रया सफू धुकू खः । न्ह्याथाय् च्वंगु ज्याझ्वः छाय् मजुइमा, नेपालभाषाया दक्व धइथें सूचंला थनं हे प्रवाह जुयाच्वनी ।
उकिं नातिबज्रया सफू धुकू छगू सामाजिक सञ्जाल खः धयां छुं पाइथें मच्वं । थौंकन्हय् सामाजिक सञ्जाल अर्थात प्रविधिया यक्वं विकास जुइधुंकल । अझं थुगु सफू धुकूपाखें थजाःगु ज्यां दिपा काःगु मदुनि । अन च्वनाः नेपालभाषाया बारे अल्छी मचासे दुग्यंक व ध्वाथुइक खँल्हाना च्वनीम्ह सःस्यूम्ह नातिबज्र दाइ थः म्हमफूगुलिं उगु पसलय् मच्वंगु नं च्यादँ झिदँ धइथें दत । थः म्हमफूसां वय्कलं थः केहेँया काय् भिन्चा भाजु पवनयात उगु पसलय् तयाः नेपालभाषाया सफू व पत्रपत्रिका मीगु ज्या मदिकू ।
न्हापा नातिबज्र च्वनादीबलय् जुयाच्वंगु सुचना प्रवाहया ज्या अलय् सामाजिक सञ्जालया ज्या प्रविधिया विकासलिसें छुं भतिचा सालुया वंसांज्या द्यूगु धाःसा मदुनि । अथेहे थन न्हापा अग्रज साहित्यकारत मुनाः साहित्यिक गफ याय्गु दबूथें जुयाच्वंगु थाय् खःसा नातिबज्र पसलय् च्वने मफूसेंलि धाःसा भतिचा साहित्यकारत म्हो जक आवत जावत जूगु खनेदु । भोताहिति थेंजाःगु थासय् मेमेपिं सकसिनं अनेक पसः तयाः आम्दानी यानाच्वंगु दु । तर नातिबज्रया सफू धुकू न्यय् दँ न्ह्यःनिसें वहे नेपालभाषाया सफू व पत्रपत्रिका मीगु पसः हे तिनि ।
न्हापा नकतिनि नकतिनि जक नेपालभाषाया एफ.एम. शुरु जूबलय् नं ज्याझ्वः न्ह्याकामि व न्यँमिया दथुइ सूचं प्रवाह याय्गु, पौ कालबिल याय्गु थेंजाःगु ज्या यानाः नेपालभाषाया ज्याझ्वःया प्रचार प्रसार व विकास याय्गुलिइ नातिबज्रया सफू धुकूया आपालं योगदान दु । अथेहे दकलय् न्हापां नेपाल टेलिभिजनं प्रसारण जूगु ज्याझ्वः “हसना”या पौ कालबिल याय्गु माध्यम नं थ्व हे सफू धुकू खः । थ्वहे झ्वलय् जितः नं साहित्य ख्यलय् म्हसीका बीगुलिइ वय्कःयागु तःधंगु भूमिका दु ।
छाय्धाःसा जिं थुगु ख्यलय् पलाः तयाबलय् सुनानं जितः उलि म्हमस्यूनि, तर वय्कलं अन वइपिं न्ह्याम्हेसितं “का मीना बज्राचार्य धाइम्ह छम्ह न्हूम्ह च्वमि दु । वइत नं ज्याझ्वलय् ब्वति काय्केमाः ।”थथे धकाः जिगु नामय् नं ब्वनापौ कयादी । जि वलकि वय्कलं जितः धयादी, “का फलानो सफू पिथनेत च्वसु माल हँ । च्वयाः थन हे बी हिं । जिं इमित बियाछ्वय् ।” गबलें का फलानो थासय् छगू ज्याझ्वः दु । छन्त नं ब्वनापौ वःगु दु न्हां ।”धकाः लय्तायाः जितः बियाहइ । थथे हे यायां जिं हे मचाय्क थ्व ख्यलय् ताय्तिति यायां पलाः न्ह्याकागु खः ।
वय्कःया हे कुतलं यानाः जितः न्ह्याग्गु ज्याझ्वलय् नं सतेगु व ब्वति काय्केगु याना हल । नेपालभाषां छुं नं कथंया ज्याझ्वः वा पत्रपत्रिका, सफू पिहाँ वइगु खँ जुलकि जितः नातिबज्र दाइ नं धया बिज्याइ । जिं नं वय्कःया आज्ञा शिरोपर यानाःसाहित्यिक च्वसा न्ह्याकातुं वना । जितः थ्व ख्यलय् न्यासि वनेत लँ क्यना बिज्याःम्ह वरिष्ठ साहित्यकार एवं भाषाह्यःमि जिगु साहित्य गुरु नातिबज्र बज्राचार्य खः ।
सफू धुकू न्यय्दँ क्यंगु लसताय् छगू तःजिक ज्याझ्वः याय्गु वय्कःया तःधंगु इच्छा खः । तर थुगु इच्छा पूवने मलावं आकाझाकां चय्दँया बैंशय् थ्व संसारपाखें बिदा कया बिज्यात । वय्कः सदां झीगु नुगलय् जाहाँ थीगु नःगुथें थिनाच्वनी । सदां अमर जुयाच्वनी । वय्कःया आत्मा सुखावति भुवनय् वास लाय्मा धइगु कामना यानाः वय्कः गुरुप्रति दुनुगलं हार्दिक श्रद्धा देछानाच्वना ।
