नेपालमण्डल दाफा महोत्सव क्वचाल
लहनान्यूज | चिल्लाथ्व षष्ठी ११३७ (मार्च ४ २०१७)
नेपालमण्डल टेलिभिजन व ललितपुर मलया ग्वसालय् जूगु नेपालमण्डल दाफा महोत्सव शनिवाः क्वचाःगु दु ।
थ्व हे झ्वलय् थौं हे ललितपुर मलया नायः नेपाल डंगोलं महोत्सवया बारे कनादिसें वइगु चैत्र २७ गते औपचारिक ज्याझ्वः यानाः क्वचायेकेगु जानकारी बियादिल । अथेहे नेपालमण्डल दाफा महोत्सव निर्देशन समितिया नायः सताब्दी पुरुष संस्कृतिविद् सत्यमोहन जोशीं आःतक गबलें नं मजूनिगु कथं दाफा महोत्सव जूगु धयादिल ।
नेपालमण्डल दाफा महोत्सव निर्देशन समितिया छ्याञ्जे श्रीकृष्ण महर्जनं नेपालमण्डल दाफा महोत्सवं यक्व हे कीर्तिमान कायम याःगु धयादिल । वयकलं थ्यंमथ्यं १५३ घौतक टेलिभिजनपाखें प्रत्यक्ष प्रशारण जूगु, मिसापिन्सं दाफा थाःगु, २०दं क्वययापिन्सं नं दाफा थाःगु, झिंस्वदँ दुम्हनिसें गुइस्वदँ दुम्हेस्यां तक नं दाफा थाःगु, मिसाम्हेस्यां हे नौबाजा थाःगु धइगु छगूकथं कीर्तिमान हे जूगु कनादिल ।
महर्जनं समापन समारोहस प्यद्वःम्ह स्वयांं अप्वः कलाकारपिन्त दसिपौ बीगु नं जानकारी बियादिल ।
लगभग न्याला धैथें न्ह्याःगु महोत्सवय् थ्यंमथ्यं प्यद्वःम्ह स्वयांं अप्वः कलाकारपिनिगु ब्वति दुगु खः । स्वनिगः लिसें स्वनिगलं पिने दोल्खा, चित्लाङ, भोजपुर, रामेछाप, काभ्रेया नेवाःतयसं तकं थःथःपिनिगु दाफा न्ह्यब्वःगु खः ।
द्यःप्याखंनिसें धिमे प्याखंतकं न्ह्यब्वःगु महोत्सवय् थःथःपिनिगु मौलिक कथंया वसः पुनाः दाफा न्ह्यब्वयेगु ज्या जूगु खः । गुकी झिंस्वदँ दुम्ह मचांनिसें गुइस्वदँ दुम्ह ज्याथःम्हं तकं ब्वति काःगु दुगु खःसा मिसापिन्सं तक दाफा थानादीगु खः ।
वंगु कार्तिक १२ क्वःपुजानिसें प्रत्येक वाःया शुक्रवाः व शनिवाः जुयाच्वंगु नेपालमण्डल दाफा महोत्सवय् मुक्कं याना १५१गू दाफा खलःपाखें ब्वति काःगु खः ।
