नेपाली काँग्रेसं थौं ४६क्वःगु राष्ट्रिय मेलमिलाप दिवस हनाच्वंगु दु ।

कांग्रेस मूख्यालयं छुं हे औपचारिक ज्याझ्वः मतःसां जिल्ला अले स्थानीय तगिमय् राष्ट्रिय मेलमिलाप दिवस हनीगु जूगु दु । वीपी कोइरालालिसेंया नेतात भारतया प्रवास त्यागे यानाः नेपाल लिहांवःगु दिंया लुमन्तिइ कांग्रेसं मेलमिलाप दिवस हनीगु जूगु खः ।

थ्व झ्वलय् बिपी संग्रहालयस बिपी कोइराला, गणेशमान सिंहलिसेंया नेताया झ्वाताय् स्वांमाः क्वखायेकेगु ज्याझ्वः दुगु धाःगु दु ।

२०१७ साल पुस १ गते जुजु महेन्द्रं वीपी कोइरालाया निर्वाचित सरकारयात अपदस्थ यायेधुंकाः २०२५ सालतक्क जेलय् दुम्ह वीपी कोइरालालिसेंया नेतात रिहा जुइधुंकाः भारत प्रवासय् वंगु खः ।

२०३३ साल पुस १६ गते वीपी कोइराला, गणेशमान सिंह, शैलजा आचार्य, खुमबहादुर खड्कालिसेंया नेतात मेलमिलापया हसनालिसें नेपाल लिहांवःगु खः । मृत्युदण्डया मुद्दाया वास्ता मयाःसे वीपी कोइराला स्वदेश लिहांवःगु खः ।

Categorized in राष्ट्रिय