नेपाली कांग्रेस १३ वडां गणतन्त्र दिवस हन
लहनान्युज | अनलाथ्व पुन्हि ११३८ ( मे २९ २०१८ )
११ क्वःगु गणतन्त्र दिवसया लसताय् नेपाली कांग्रेस येँ महानगर १३ वडा इकाई समितिया ग्वसालय् येँया कालिमाटी चुकय् चित्तधर झ्वाता मतः च्याका ज्याझ्वःजुगु दु ।
उगु ज्याझ्वलय् गणतन्त्र दिवसया लसताय् फुक्क नेपाःमिपिन्त भिंतुना बियादीसें मूपाहाँ नेपाली कांग्रेस मूदुजः व पुलाम्ह मन्त्री नविन्द्रराज जोशीं वर्तमान सरकारं अदालतपाखें सजायया आदेश ब्यूम्ह मनूयात आममाफी बियाः मानवअधिकारया तप्यंक उल्लंघन यागुया घोर विरोध यासें छुं नं अधिनायकवाद झीत मान्य जुइमखु धकाः धयादिल ।
गणतन्त्र धैगु जनतापाखें जनतायात याइगु शासन खः धयादीसेंं वर्तमान सरकारं गति काये मफइगु नीति व ज्याझ्वः न्ह्यब्वःगुलिं उकिया नं विरोध न यानादील थुकिया प्रतिवाद यायेत नेपाली कांग्रेसयात साथ बिइत नेता जोशी जनतायाके आह्वान यानादिल ।
उगु ज्याझ्वलय् पूर्व सभासद् राज्यलक्ष्मी श्रेष्ठ, येँ महानगर १३ वडा इकाई सभापति सुरेन्द्र मानन्धरपिन्सं नं गणतन्त्र दिवसया लसताय् भिंतुना देछासें थःथःगु नुगःखँ तयादीगु खः ।
