नेपाल–भारतया निन्हुयंकया मंकाः आयोगया न्याक्वःगु मुँज्या क्वचाल
लहना न्यूज | ने.सं. ११३९ गुंलागा सप्तमि (२२ अगष्ट, २०१९), विहिवाः
पारस्परिक साझेदारी व सहकार्ययात निरन्तरता बीगु सहमति प्वंकूसें नेपाल–भारत मंकाः आयोगया न्याक्वःगु मुँज्या क्वचाःगु दु ।
परराष्ट्रमन्त्री प्रदीपकुमार ज्ञवाली व भारतया विदेशमन्त्री सुब्रमण्यम जयशंकरया सहअध्यक्षताय् जूगु मुँज्याय् निगुलिं पक्षं नेपाल–भारत सम्बन्धया फुक्क पक्षया समीक्षा यायेगुलिसें सम्पर्क सञ्जाल विस्तार, आर्थिक साझेदारी, व्यापार व पारवहन, उर्जा जलश्रोतया नापनापं संस्कृति व शिक्षाय् केन्द्रित जुयाः सहलह जूगु खः ।
परराष्ट्र मन्त्रालयकथं मुँज्याय् सन् १९५० मैत्री व शान्ति सन्धीया पुनरावलोकन व नेपाल–भारत सम्बन्धय् प्रबुद्ध ब्यक्ति पुचः (इपिजी)या प्रतिवेदन लःल्हाना कायेगु खँय् सहलह जूगु खः । भारतीय पक्षं इपिजीया प्रतिवेदन आःतक लःल्हाना काःगु मदुनि ।
वंगु निदँय् निगुलिं देसपाखें जूगु उच्चस्तरीय भ्रमणलिपा नेपाल–भारत सम्बन्धय् फुक्क पक्षं गति काःगुलिं मंकाः आयोगं लसता प्वंकूगु दु ।
मुँज्याय् अन्तर्राष्ट्रिय, क्षेत्रीय व उपक्षेत्रीय मञ्चय् निगू देस दथुइ ग्वाहालि कालबिल यायेगु खँय् नं दुग्यंक सहलह जूगु खः ।
मोतिहारी–अम्लेखगञ्ज पेट्रोलियम पदार्थया पाइपलाइन, हुलाकी राजमार्गया प्यंगू खण्ड दयेकेगु ज्याय् जूगु प्रगति, भुखाय् लिपा नक्वाः व गोरखा जिल्लाया सर्वसाधारणया आवास दयेकेगु ज्या क्वचाःगुलिं आयोगया मुँज्याय् लसता प्वंकल ।
नापं मुँज्याय् जयनगर–जनकपुर, जोगवनी–विराटनगर, सीमा पार रेल परियोजना व विराटनगरय् एकीकृत जाँच चौकी दयेकेगु ज्या जूगु उपलब्धिया समीक्षा तकं जूगु खः ।
भारतया ग्वाहालिइ नेपालय् न्ह्यानाच्वंगु विकास निर्माणया परियोजनायात तीब्र गतिइ न्ह्यःने यंकेत निगुलिं देसं सहमति प्वंकूगु दु ।
प्रधानमन्त्री केपी शर्मा ओलीया सन् २०१८या भारत भ्रमणया इलय् रक्सौल–येँ विद्युतीय रेल लाइन, आन्तरिक जलमार्ग व कृषि ख्यलय् साझेदारी यायेगु खँय् जूगु न्हूगु सहमति व उकी जुयाच्वंगु प्रगतियात कयाः आयोगं सन्तुष्टि प्वंकूगु दु ।
निगुलिं देसं व्यापार पारवहन व रेल सेवा सम्बन्धी सन्धी सम्झौतायात याकनं निष्कर्षय् थ्यंकेत सहमति प्वंकूगु दु । निगुलिं देस दथुइ मू सीमा नाकाय् व्यापार व पारवहनयात अःपुकीगु भौतिक पूर्वाधारया भिंकेज्यालिसें स्तरोत्रति यायेत निगुलिं देस सहमत जूगु दु ।
सीमा क्षेत्रय् दुपिं जनताया नितिं डुबान छगू गम्भीर समस्याकथं जुयाच्वंगु स्वीकार यासें मंकाः आयोगं लःया प्राकृतिक बहाबय् पंगः व माःकथंया निकासया व्यवस्था मजूगुलिं डुबान समस्यायात सम्बोधन यायेमाःगु खँय् बः ब्यूगु दु । नेपाल–भारत सीमा क्षेत्रया डुबान प्रभावित भेगय् निगुलिं देसया मंकाः प्राविधिक पुचलं ब्यूगु सुझाव कार्यान्वयन यायेत निगुलिं देस सहमत जूगु दु ।
निगुलिं देसया परराष्ट्रमन्त्रीं सामाजिक व आर्थिक विकासया नितिं पर्यटनया महत्वय् बः ब्यूसें नेपाल भ्रमण वर्ष २०२०यात ताःलाकेत नापं पर्यटन ख्यलय् ग्वाहालिया स्तर अभिबृद्धि यायेत सहमति क्यंगु दु ।
नेपाःया इनापय् अतिरिक्त हवाई प्रवेश उपलब्ध याकेत भारतलिसे नेपाल सरकारं याःगु इनापकथं निगू देसया नागरिक उड्डयन प्राधिकरण दथुइ सहलह न्ह्यानाच्वंगुलिं उकिं बांलाःगु लिच्वः पिहांवइगु विश्वास निगुलिं देसं याःगु दु ।
Categorized in राष्ट्रिय
