नेपाल न्हापांगु कासाय् बुत
लहनान्यूज सम्वाददाता | कौलाथ्व अष्टमि ११३६ (९ अक्टोबर २०१६)
हङकङय् थौंनिसें न्ह्याःगु मिसा विश्वकप क्रिकेटया ल्यज्या कासाय् थःगु न्हापांगु कासाय् बूगु दु ।
थौं हङकङया तिन क्वङ रोड रिक्रिएसन ग्राउन्डय् थाइलायन्डलिसे जूगु कासाय् नेपाल ६ विकेटं बूगु खः ।
टस त्याकाः न्हापां ब्याटिङ याःगु नेपालं १९.२ ओभरय् दक्वं विकेट तंकाः ७७ रन जक दयेकेफत । लिसलय् ७८ रनया आज्जु ज्वनाः ख्यलय् वःगु थाइलायन्डया मिसा पुचलं १६.३ ओभरय् ४ विकेटया क्षतिइ कासा थःगु ल्हातय् लाकल ।
एशियाली लागाया ल्यज्या कासाय् नेपालं हङकङलिसें म्हितेधुंकाः थाइलाय्न्ड व चीनलिसे नं कासा म्हितेमानि । पुचलय् प्रत्येक टोलिं थःथवय् दथुइ कासा म्हितेमाः ।
पुचलं न्हाप लाइगु टोलिं सन् २०१७य् जुइगु मिसा विश्वकपया लिपांगु ल्यज्या कासाय् ब्वति कायेखनी ।
