नेपाल संवत् ११४१ हनेत समारोह समिति नीस्वंगु दु
लहानान्युज | कौलाथ्व चतुर्दशी ११४०,कार्तिक १४ शुक्रवाः
नेपाल संवत् ११४१ या न्हूदँ दच्छियंकं थीथी ज्याझ्वः यानाः हनेत समारोह समिति नीस्वंगु दु ।
रमेश महर्जनया नायःसुइ ‘नेपाल संवत् न्हूदँ राष्ट्रिय समारोह समिति ११४१’ नीस्वंगु खँ समितिं शुक्रवाः छगू विज्ञप्ति पिथनाः समितिं जानकारी ब्यूगु दु ।
कोरोना संक्रमणया जोखिम दुगुलिं भेला सःतेगु अवस्था मदुगुलिं वंगु दँया न्हूदँ समारोह समितिया हे दुजः व प्रतिनिधितय्त दुथ्याकाः न्हूगु समितियात निरन्तरता बियागु खँ नायः महर्जनं जानकारी बियादीगु दु ।
नायः महर्जनं बियादीगु जानकारी कथं वंगु असोज १२ गते च्वंगु समितिया मुँज्यां समितिया सल्लाहकार एवं सांस्कृतिक, सम्पदा व सामाजिक अभियन्तापिनि सल्लाहकथं न्हूगु समिति नीस्वनेगु निर्णय याःगु खः । समितिइ दुथ्याःगु खलःपुचःतय्सं थःपिनि प्रतिनिधि हिलाबुला यायेफइगु व वंगु दँय् दुमथ्याःगु खलःपुचलं थुगुसी थःपिनि प्रतिनिधि दुथ्याकेफइगु निर्णय नं मुँज्याय् जूगु विज्ञप्तिइ न्ह्यथनातःगु दु ।
नेपाल संवत् उत्सव जक मखसे सांस्कृतिक जागरण नं जूगु विज्ञप्तिइ न्ह्यथनातःगु दु । विज्ञप्तिइ न्ह्यथनातःगु दु, “नेपाल संवत् हनेगु उत्सव जक मखसे सांस्कृतिक जागरण अभियान लिसें राज्यया सांस्कृतिक नीतिइ हस्तक्षेप यायेगु आन्दोलन नं खः । लिसें नेपाल संवत् आन्दोलनया प्रवर्तक मदुम्ह पद्मरत्न तुलाधरयात लुमंकुसे वय्कलं क्यंगु सांस्कृतिक एकता व राष्ट्रियता प्राप्तिया लँपुइ न्ह्याःवनेगु संकल्प यायेगु नं खः।”
देय्या हे नामय् नेपाल संवत् नीस्वनादीम्ह शंखधर साख्वाःयात राज्यं राष्ट्रिय विभूति घोषणा यायेधुंकूगु व नेपाल संवत्यात राष्ट्रिय संवत् घोषणा यायेधुंकूगु नेपाल संवत्या आन्दोलनया सफलता जूगु विज्ञप्तिइ न्ह्यथनातःगु दु । तर आः नं सरकारी ज्याखँय् नेपाल संवत्यात छ्ययेकेत, नेपाली राष्ट्रियता ल्वय्क संवत्यात कयाः माःकथंया नीति दयेकेत सरकारयात बाध्य यायेत, देय्या दक्व जनजातिया सांस्कृतिक नखःचखःतय्त समानताया आधारय् समान सरकारी व्यवहार याकेत थ्व आन्दोलनया औचित्य ल्यं दनीगु नं विज्ञप्तिइ न्ह्यथनातःगु दु ।
कोरोना महामारी ल्यना हे च्वंगु इलय् नेपाल संवत् ११४१ या न्हूदँया समारोह गुकथं हनेगु खः थ्वयात कयाः नेपाल संवत् आन्दोलनया न्ह्यलुवाःपिं व खलःपुचःनाप सहलह ब्याकाः याकनं हे निर्णय पितबीगु खँ नं समितिया नायः रमेश महर्जनं विज्ञप्तिइ न्ह्यथनादीगु दु।
Categorized in राष्ट्रिय
