नेवाः मिडियाया बुदिं तिस्टुङय् हन
लहनान्यूज | यंलाथ्व एकादशि ११३७ (सेप्टेम्बर २ २०१७)
नेवाः मिडिया प्रा.लि.या न्हापांगु बुदिंया लसताय् प्रा.लि.या व्यवस्थापकीय पुचःलिसें पत्रकारपिनिगु छगू पुचः तिस्टुङय् वनाः छगू ज्याझ्वः यासें अनया स्थानीय बाजंखलःयात बाजं लःल्हाःगु दु ।
नेवाः मिडिया प्रा.लि.या ग्वसाः अले तिस्टुङ्ग बज्रबाराही नेवाः पुचः व रामलाल स्मृति प्रतिष्ठानया मंकाः ग्वसालय् जूगु ज्याझ्वःया दथुइ थाहा नगरपालिका दुनेया तिस्टुङ्ग, पालुङ्ग व चित्लाङ्गया थीथी परम्परागत झिगू बाजं खलःयात बाजं लःल्हाःगु खः ।
नेवाः मिडिया प्रा.लि.या नायः सन्तकुमार महर्जनया सभापतित्वय् जूगु ज्याझ्वलय् तिस्टुङया कुन्छाल बाजं खलः, पालुङ्ग बाजं खलः, तेष्टुङ्ग बाजं खलः, द्यःला बाजं खलः, लिलाखेल बाजं खलः लिसें चित्लाङ्गया चित्लाङ बाजं खलःयात खिं, ताः व बबूचा छगू छगू सेट लःल्हाःगु खः ।
अथे हे कुलगांउ बाजं खलः, तेष्टुङ्गयात खिं छगः, कोठननी बाजं खलः, पापुुङ्गयात धाःबाजं छगः, कपाली समाज, तिस्टुङ्गयात म्वायलि छपु व बौद्ध गुम्बा, ओखर गांयात लामा झ्याम्टा छज्वः लःल्हाःगु खः ।
मुक्कं १ लख ५१द्वः व न्यासः तका ज्वलिंज्वःया बाजंत न्यायेत देशय् विदेशय् च्वंपिं कलाप्रेमीपिनिगु पाखें आर्थिक ग्वाहालि वःगु प्रा.लि.या नायः सन्तुकुमार महर्जनं जानकारी बियादिल । संस्थाया बुदिं हनेगु झ्वलय् भ्वय् न्यायेकाः न्ह्यइपुकेगु स्वयां संस्कृति संरक्षणया ख्यलय् छुं तिबः जुइगु ज्या यायेगु ताःतुनाः थुगु ज्याझ्वः यानागु नायः महर्जनं लहनान्यूजयात कनादिल ।
। ज्याझ्वलय् मू पाहां पूर्व राज्यमन्त्री तीर्थराम डंगोल, पाहांपिं थाहा नगरपालिकाया प्रमूख लवशेर विष्ट, थाहा नगरपालिकाया उपप्रमूख खड्ग बहादुर गोपाली, थाहा नगरपालिया वडा नं.१या वडाध्यक्ष हेरामान गोपाली, रामलाल श्रेष्ठ स्मृति प्रतिष्ठानया संरक्षक जयराम लामिछाने, नेवाः मिडिया क्लबया नायः नविन जोशीलिसें नं थाहा नगरपालिकाया सांस्कृतिक गतिविधि व पर्यटकिय सम्भाव्यतावारे न्वःवानादीगु खः ।
रामलाल स्मृति प्रतिष्ठानया नायः विनोद महर्जनं लसकुस न्वचु बियादीगु खः ज्याझ्वलय् तिस्टुङ्ग बज्रबाराही नेवाः पुचःया नवनिर्वाचित नायः हरिगोपाल श्रेष्ठं सुभाय् देछानादिल ।
औपचारीक ज्याझ्वः धुंकाः येँय् नं वंगु संचारकःमिपिनिगु पुचलं तिस्टुङलिसें चित्लाङ व पालुङया थीथी थायया स्थलगत भ्रमण नं याःगु खः । शुक्रबाः व शनिबाः निन्हुयंकंया भ्रमणया झ्वलय् अनुसन्धानधाता एकाराम सिंहं उगु थायया ऐतिहासिक, सांस्कृतिक पक्षया बारे जानकारी याकादीगु खः ।
उकिया लिसें औपचारीक ज्याझ्वः जूगु दिं शुक्रबाःया बहनी तिस्टुङ, पालुङ, चित्लाङया थीथी पक्षयात कयाः संचारकःमिपिनि दथुइ अन्तक्र्रिया नं जूगु खः । अन्तरक्र्रियाया झ्वलय् अनुसन्धाता एकाराम सिं व स्थानीय अभियन्तापिन्सं संचारकःमिपिनिगु जिज्ञासाया लिसः बियादीगु खः ।
Categorized in राष्ट्रिय
