२०८० चैत्र १६, शुक्रबार

नेवाः मिडिया कप फुटसल जुइगु

लहनान्यूज | बछलाथ्व द्वितीया ११३७ (अप्रिल २८ २०१७)

नेवाः पत्रकार राष्ट्रिय दबू, येँ जिल्लां नेवाः मिडिया कप फुटसलया ग्वसाः ग्वइगु जूगु दु ।
 
पत्रकार दबू, येँ जिल्लां थौं ग्वसाः ग्वःगु ‘लाखाछेँ सानुकाजी लुमन्ति फुटसल धेंधें बल्लाः’ ज्याझ्वलय् दबुलिं रनिङ शील्ड लिसें नेवाः मिडिया कप फुटसल न्ह्याकेगु घोषणा याःगु खः । नेवाः संचार गृह अथवा थीथी संचार गृहस कार्यरत नेवाः पत्रकारतय् दथुइ मिडिया कप धेंधें बल्लाः जुइगु ज्याझ्वलय् धाःगु खः ।
 
पत्रकार दबू, येँया दांभरिं लिसें थीथी नेवाः संचार माध्यमया नितिं ग्वाहालि यानाच्वंम्ह पत्रकार मदुम्ह सानुकाजी महर्जनया लुमन्ति थौं ग्वसा ग्वःगु ‘लाखाछेँ सानुकाजी लुमन्ति फुटसल धेंधें बल्लाखय् धाःसा इमेज च्यानलया ख्वताबजि ज्याझ्वः पुचः न्हाप लाःगु दु ।
 
सुरेन्द्र तुलाधरया कप्तानीइ ख्यलय् कुहांवःगु ख्वताबजि पुचलं सुरेन्द्र मानन्धरया कप्तानीइ दुगु इमेज च्यानलया हे समयबजि पुचःया टाइब्रेकरय् बुकाः न्हाप लाःगु खः । क्वःछिनातःगु ईया दुने कासा २–२ गोलया ज्वलिंज्वः जुइधुंकाः कासाया त्याकामि टाइब्रेकरपाखें ल्यःगु खः ।
 
 
ग्वसाः खलः पुचः नेवाः पत्रकार राष्ट्रिय दबू, येँ धाःसा नेवाः पत्रकार राष्ट्रिय दबू, यलयात ६–० बुकाः लियांल्यू जुइत ताःलात ।
 
धेंधें बल्लाखय् नेपालभाषा संकिपा समाजया गोलरक्षक सुरेन्द्र महर्जन सर्वश्रेष्ठ कासामि घोषित जुल । अथे हे समयबजि पुचःया स्ट्राइकर प्रकाश महर्जनं ११ गोल यासें सर्वाधिक गोलकर्ताया सिरपाः त्याकेत ताःलात ।
 
कासाय् सकल त्याकामि, ब्वतिमिपिन्त वरिष्ठ समाजसेवी लिसें उद्यमी लक्ष्मण गमालं तक्मा लःल्हानादिल । अथे हे समाजसेवी बालकृष्ण महर्जनं दसिपौ लःल्हानादिल ।
 
नुगःखँ तयेगु झ्वलय् वरिष्ठ समाजसेवी लक्ष्मण गमालं नेवाः कलाकार व पत्रकारपिनिगु दथुइया फुटसल कासां एकताया हसना नं ब्यूगु धयादिल ।
 
धेंधें बल्लाखय् पत्रकारपिनिगु प्यंगू लिसें कलाकार सम्वद्ध प्यंगू यानाः च्यागू टिमया ब्वति दुगु खः श्र कासाय् नेवाः पत्रकार राष्ट्रिय दबू, केन्द्र व येँया लिसें यल व ख्वपया पुचःया ब्वति दुगु खः । अथे हे कलाकार पुचःपाखे इमेज च्यानलया ख्वताबजि व समयबजि पुचःलिसें नेपालभाषा संकिपा समाज व नेवाः संकिपा राष्ट्रिय दबया ब्वति दुगु खः ।
Categorized in कासा