नेवाः मुक्ति मोर्चाय् राजेन्द्रया नेतृत्व
लहनान्यूज | थिंलागा एकादशि ११३७ (डिसेम्बर २४ २०१६)
विप्लव नेतृत्वया नेकपा माओवादिया भातृ संगठन नेवाः मुक्ति मोर्चाय् तत्कालीन दांभरिं भाजु राजेन्द्र महर्जनयात न्हूम्ह नायः ल्यःगु दु ।
थौं येँय् क्वचाःगु मोर्चाया तःमुँज्यां पुलांगु कार्यसमितिया दांभरिं महर्जनयात सर्वसम्मतिं न्हूम्ह नायः ल्यःगु खः । तःमुँज्यां ल्यःगु ३१ दुजःया न्हूगु कार्यसमितिइ रमेश महर्जनयात मू छ्यान्जे कथं ल्यःगु दु ।
व स्वयां न्ह्यः मोर्चाया नायः धनबहादुर महर्जनया सभानायकय् तःमुँज्याया उद्घाटन सत्र क्वचाःगु खः ।
उद्घाटन सत्रय् ज्याझ्वःया मू वक्ता नेकपा माओवादिया नायः नेत्रविक्रम चन्दं संसदिय व्यवस्थाया विकल्पय् वैज्ञानिक समाजवादया लँपुइ वनेमाःगु धयादीगु खः । नायः चन्दं सत्ताधारीं शोषण याइगु व आम सर्वसाधारण शोषित जुइगु संसदीय प्रणालीया थासय् वैज्ञानिक समाजवादयात न्ह्यःने हयेमाःगु धयादीगु खः ।
देशय् जूगु यूगान्तकारी परीवर्तनय् नेवाः बुद्धिजिवी व ल्यायम्हतयगु तःधंगु भूमिका दुगु चन्दया धापू खः । लिसें नेवाः बुद्धिजिवि लिसें ल्यायम्हतयगु विश्वास कायेफःसा जक हे एकिकृत जनक्रान्ति सफल जुइगु खँय् चन्दं बः बियादिल ।
तःमुँज्याया उद्घाटन सत्रया उलेज्या चन्दं मैनमत च्याकाः यानादीगु खः । ज्याझ्वलय् लसकुस दांभरिं राजेन्द्र महर्जनं लसकुस यानादीगु खः ।
Categorized in राजनीति
