न्यू जेनिथया भिन्तुना ज्याझ्वः क्वचाल
लहनान्यूज | तछलागा दशमी ११३७ (जुन १९ २०१७)
येँया तपिंतास्थित न्यू जेनिथ इंगलिस मोडल स्कूलं स्थानीय तहया न्हापांगु चरणया निर्वाचनया झ्वलय् येँ महानगरपालिका १८ वडाय् निर्वाचित वडाध्यक्ष लिसें सदस्यपिन्त भिन्तुना देछाःगु दु ।
स्कूलया प्रधानाध्यापक राजु महर्जनया सभाध्यक्षताय् जूगु ज्याझ्वलय् येँ महानगरपालिका १८ वडाय् निर्वाचित वडाध्यक्ष न्हूछेँकाजी महर्जनलिसें सकल सदस्यपिन्त ख्येँय् सगं बीगु लिसें स्वांमाः कोखायेकाः भिन्तुना देछाःगु खः ।
थःगु नुगः खँ तसें ब्वनेकूया प्रधानाध्यापक राजु महर्जनं आः १८ वडा दुने शिक्षाया स्तर थकायेगु भाला नवनिर्वाचित जनप्रतिनिधिपिनिगु ब्वहलय् वःगु धयादिल । लिसें वय्कलं नवनिर्वाचित जनप्रतिनिधिपिन्त आर्थिक ल्याखं अति विपन्न परीवारया नितिं नं शिक्षाय् सहज पहुँच दयेकेगु नितिं पहल यायेत इनाप यानादिल ।
येँ महानगरपालिका १८ वडाया नवनिर्वाचित वडाध्यक्ष न्हूछेँकाजी महर्जनं विकासया आधारशीला धयागु हे शिक्षा जूगुलिं आर्थिक कारणंसुं नं शिक्षां वन्चित जुइमालीगु अवस्था न्हंकेत थः जायेगु धयादिल ।
उगु हे ज्याझ्वलय् न्यू जेनिथपाखें एसइइ परीक्षाय् ताःलाःपिं विद्यार्थीपिन्त उज्वल भविष्यया भिन्तुना लिसें विदाइ नं ब्यूगु खः ।
थगुने क्वचाःगु एसइइ परीक्षाय् न्यू जेनिथपाखें ५४म्हेसिनं परीक्षा ब्यूगु खःसा दक्वं हे विद्यार्थी ताःलानाः ३२म्ह विद्यार्थी ए व ए प्लस लिसें पास जूगु खः ।
Categorized in राष्ट्रिय
