कोरोना भाइरसया महामारीया निगगु लहरय् अस्पतालय् बेड, अक्सिजन, आइसीयु, भेन्टिलेटरया ब्यवस्थाय् ध्यान वनेमाःगुपाखें थीथी क्षेत्रया विज्ञतयसं ध्यानाकर्षण याकादीगु दु ।

नेवाः पत्रकार राष्ट्रिय दबु सचेतना (अनलाइन) ज्याझ्वः कमिटीया ग्वसालय् शनिबार बहनी थुगु ज्याझ्वःया ५० ब्वः थ्यंगु लसताय् जुगु लसता हना अन्तक्र्रियाय् सांसद जीवनराम श्रेष्ठं कोरोना महामारीं स्वास्थ्य क्षेत्रय् नेपाःया अवस्था यक्वः कमजोर धकाः छर्लङ्ग यागु दु, धयादिल । ‘कोरोनाया निगुगु लहरय् स्वनिगलय् भेन्टिलेटर व आइसीयु मदया हाहाकारया स्थिति जुयाच्वंगु दु । थुकियात याकन हे सुधार याये मालेधुंकल । थ्वः पक्षय् सुधारया निंति संसदया कोभिड १९ अध्ययन व अनुगमन उपसमितिपाखें सरकारयात १९ बुँदाय् सुझाव बियागु खँ वय्कलं कनादिल । सांसद श्रेष्ठ थुगु उपसमितिया संयोजक नं खः । उगु सुझाव पत्रय् अस्पतालयात अपडेट याय्गु, कोभिडयात ध्यानय् तया आइसीयु, भेन्टिलेर बृद्धि याय्गु, पर्याप्त अक्सिजन प्लान्ट जडान याय्गु थेंजाःगु खँ दुथ्याःगु खः । वयकलं संघीय सरकार, प्रदेश सरकार व स्थानीय सरकारया समन्वय मदया नं समस्या जुयाच्वंगु जानकारी बियादिल ।

त्रिवि शिक्षण अस्पतालया जनरल प्राक्टिस व इमर्जेन्सी मेडिसिन विभागया प्रमुख प्रो. डा. योगेन्द्रमान शाक्यं अन्तक्र्रिया ज्याझ्वलय् त्रिवि शिक्षण अस्पतालनापं देयन्यंक बेड, आइसीयु व भेन्टिलेटर अभाव जुगु स्थितिया जानकारी बियादिल । वयकलं धयादिल– थ्वः कोरोना इलय् थःत माःबलय् बेड मालेथाकुगु अनुभव याना, झन सर्वसावधारणतयगु हालत गथे जुइ अनुमान याय्फु । अथेखसां ग्यानाः मखु सतर्क जुया थ्वः महामारीया सामना यायेमा धकाः सल्लाह बियादिल । थ्वः महामारींइ म्हमफुपि दथुइ १०–१५ प्रतिशतयात जक जटिल शारिरीक अवस्थाय् थ्यंकाबीगु जूगु दु ।

समाजसेवी व सकारात्मक सोचया अभियन्ता कर्ण शाक्यया धापूकथं नं सरकारं ब्यूगु प्रोटोकलत पालना यायेगु व सतर्क जुइगु थ्वः ईया आवश्यता खः । वयकलं कोरोना रोग स्वयां मानसिक तनावं अप्वः प्रभावित जुयाच्वंगु दु धयादिल । ‘जटिल अवस्थाय् थ्यंकूगु अनुभव यानावये धुंका तसकं धन्दा काय्गु परिस्थिति अप्वः खनेदया वःगुलिं कोरोनां अझ अप्वः मनुत प्रभावित जुया च्वंगु दु । वासःया थःगु हे महत्व दु तर अप्वः मन हे बःलाकेमाल । कोरोनाबारे सकलें धैथें विज्ञ थें जुइ धुंकल । अथेखःसां नियमय् मच्वंगु हुनिं समस्या जुयाच्वंगु खः । झीसं मेपिन्सं यायेमाःगु ज्याः फुक्क स्यू तर थःम्हेस्या यायेमाःगु ज्या मस्यु । अथे हे ‘राज्य गैरजिम्मेवारी जुल धाःसा झी झनं अप्वः जिम्मेवार जुइमा’ च्वमि शाक्यं कनादिल ।

अथेहे सिविन नेपालया निर्देशक सुम्निमा तुलाधरं कोरोनाया निुगूगु लहर ग्यानापुया च्वंगु दु धासें  पब्लिक हेल्थ सिस्टम कमजोर जुगुलिं सर्वसाधारणतयसं दुःख सियाच्वंगु खँ तयादिल । वयकलं कोरोना इलय् फुक्क छेँ दुने लानाच्वंबलय् घरेलु हिंसा व मस्तयत जुइगु दुव्र्यवहार अप्वः जुयाच्वंगु पक्षय् इकित नं यानादिल । थ्वः इलय् मस्त व मिसापिन्त जुयाच्वंगु घरेलु हिंसा ल्वमंके मज्यू । कोरोनां सुरक्षित जुइत छेँ दुने च्वनेमाः तर लकडाउनबलय् छेँ दुने जुइगु हिंसां मस्त, मिसात सुरक्षित जूला ? – वयकल न्हयसः तयादिला । निर्देशक तुलाधरया सिविनया बाल हेल्पलाइनय् जक ४८ गू यौन हिंसाया उजुरी दर्ता जुगु दु । निर्देशक तुलाधरं थ्वः लकडाउनया इलं समाजया वास्तविकता उजागर याःगु दु । सकसिया अधिकार प्रत्याभूति यायेगु नितिं सरकारया ध्यानाकर्षण याकूगु दु धयादिल ।

वरिष्ठ सिने पत्रकार व नेवाः पत्रकार राष्ट्रिय दबूया सल्लाहकार विजयरत्न तुलाधरं लकडाउनं कलाक्षेत्रया सिर्जना कुण्ठित जुयाच्वन तर थुकियात हाथ्याकथं कयाः वैकल्पिक माध्यमं कलाकारिताया प्रवद्र्धन यायेगु अवसर नं दु धयादिल । ‘नेवाः संकिपा ख्यः संकुचित जुयाच्वंगु अवस्था खःसां डिजटल माध्यमं विकास जुयाच्वंगु दु । थ्वः माध्यमं तत्काल लवः मब्यूसां भविष्यय् आर्थिक रुपं निर्भर जुइगु प्लाटफर्म तयार जुइ’ वयकल धयादिल ।

नेवाः पत्रकार राष्ट्रिय दबूया सचेतना ज्याझ्वः दबूया फेसबुकपाखें प्रशारण जूगु ५० ब्वः थ्यंगु लसताय् जुगु थुगु अन्तक्र्रिया ज्याझ्वलय् नेवाःपत्रकार राष्ट्रिय दबूया नायः सुरजवीर वज्राचार्यं ज्याझ्वः न्ह्याकादीगु खः ।

थगुने हलिंयात आक्रान्त याःगु कोरोना भाइरसया संक्रमण अप्वयावःगुलिं नेवाः पत्रकार राष्ट्रिय दबूपाखेँ थ्वः महामारीबारे सर्वसाधारणतय्त सुचं बीगु लिसें सचेत यायेत प्रजित शाक्यया संयोजकत्वय् सचेतना कवः गठन जुगु खः । थुगु कमिटीइ दुजःपिं रचना श्रेष्ठ, मिना वज्राचार्य, तेजनाराण महर्जन, अनूप प्रधान व हसना लवजू खः ।

 

Categorized in राष्ट्रिय