नेपाःया हिउपाया जः पद्मरत्न तुलाधरया जंक्वः हनेगु झ्वलय् वयकलं च्वयादीगु लोकंह्वाःगु ख्यालः न्ह्यब्वःसे सांस्कृतिक ज्याझ्वः जुल । थुगु ज्याझ्वलय् इमेज च्यानलपाखें प्रशारण जुयाच्वंगु नेपालभाषाया ज्याझ्वः समयबजि न्ह्यब्वया पुचः समयबजि पुचःया सुरेन्द्र मानन्धर, रेवन्तलाल श्रेष्ठ, राजेन्द्र श्रेष्ठ, राजन शाही, रजनी खड्गी, सुरेश मानन्धर व अञ्जन श्रेष्ठं “जिं लातकि...” ख्यालः न्ह्यब्वःगु खः । “जि लातकि...” थुगु ख्यालः ११०४ स पिदंगु “ख्याः बच्छि नी बच्छि” सफूतिइ दुथ्याःगु ख्यालः खःसा लिपा “जिं लातकि...” नामं १७ पु ख्यालः दुथ्याःगु सफू नं पिदन । “न्हूम्ह जिचाभाजु ससलय्” ख्यालःपाखें ख्यालः ख्यलय् पलाः न्ह्याकादीम्ह पद्मरत्नया “आः जितः नं तनतन दइवल” ख्यालः सफू नं पिदंगु दु ।
सांस्कृतिक ज्याझवलय् मेगु ख्यालः लोकंह्वाःगु टिभी सिरियल ड्याड, सन व मम न्ह्यब्वयाः वयाच्वंगु पुचलं “वा वल फय् वल” न्ह्यब्वल । आर्यम नकःमि अबुकथं व सविन शाक्य काय् अले अर्णपुर्णेश्वरी म्ह्यायया भूमिकाय् पिलुवयाः थुगु ख्यालः न्ह्यब्वःगु खः ।
ज्याझ्वलय् ग्वसाः खलःपाखें “जन्तर” ख्यालः न्ह्यब्वःगु खः । “जन्तर” ख्यालकय् आशाकाजी थकु जन्तर म्यूवइम्हेसिगु भूमिकाय् म्हितादीगु खःसा जन्तर न्यायेतवइपिनिगु भूमिकाय् उमेश स्थापित, शरद कसाः, सारा बज्रं म्हितादीगु खः ।
ज्या्झ्वलय् पद्मरत्न तुलाधर, वय्कःया जहान नीलशोभा तुलाधरयात हंगु खःसा निर्देशक पुचःया जनकवि दुर्गालाल श्रेष्ठ, भृगुराम श्रेष्ठ, गणेश साय्मि, नरेशवीर शाक्य, मल्ल के सुन्दरनापं मदनकृष्ण श्रेष्ठ, सुजीव बज्राचार्य, सुरेशकिरण मानन्धरयात नं हना देछाःगु ख ।
हनालिपा अभिनन्दन समाराेह समितिया संयोजक लक्ष्मीदास मानन्धरपाखें लसकुस यानादीगु सांस्कृतिक ज्याझ्वः राजेन्द्रमान शाक्यया कजिसुइ न्ह्याःगु खःसा ख्यालि जुजु मदनकृष्ण श्रेष्ठं ख्यालि, म्ये न्ह्यब्वःसे सुभाय् देछानादीगु खः ।
सांस्कृतिक ज्याझ्वः न्ह्याःगु धाःसा छपु अपेरापाखें खः । जनकवि दुर्गालाल श्रेष्ठं च्वयादीगु, न्ह्यू बज्राचार्यं लसय् हनादीगु  व न्ह्यू बज्राचार्य, सतिष महर्जन, सत्यनारायण महर्जन, रानीशोभा महर्जन व रत्नशोभा महर्जनं हालादीगु म्येय् सुधा महर्जन, नसला महर्जन, नमिला महर्जन, अजला महर्जन, सनिसा महर्जन, रिजा खड्गी, राजमति नापित, स्वस्तिका महर्जन, रेजिना मानन्धर, सुजिना महर्जनं हुलाप्याखं दुथ्याःगु थुगु अपेरा ईन्द्रेणी सांस्कृतिक समाज (ईसास) किपूपाखें न्ह्यब्वःगु खः । ईसासया हे सुधा महर्जन, नसला महर्जन, नमिला महर्जन, अजला महर्जन, सनिसा महर्जन, रिजा खड्गी
स्वस्तिका महर्जन, सुजिना महर्जन, दीपमाला महर्जन (स्यनामि नं) या पुचलं “नेपाः मांया म्ह्यायमचा जि नेवाः जिगु नां” म्येय् मचा हुलाप्याखं नं न्ह्यब्वःगु खः । मीना महर्जनं हालादीगु थुगु म्ये लोककवि राजभाई जकःमिं च्वयादीगु खःसा गुज्जे मालाकारं लसय् हनादीगु खः । थुगु पुचःपाखें जनकवि दुर्गालाल श्रेष्ठं च्वयादीगु व गुज्जे मालाकारं हे लसय् हनादीगु छपु पुचः म्ये नं न्ह्यब्वःगु खः । गुगु म्ये  रानीशोभा महर्जन, स्वस्ति महर्जन, वीरमाया महर्जन, दीपा महर्जन व रत्नशोभा महर्जनं हालादीगु खः ।
म्येहालामि रामकृष्ण दुवालं पंचायत कालीन राजनीतिक संघर्षय् पंचायतया विरोधी जुयाः नं राष्ट्रिय पञ्चायतया चुनाव त्याकाः पंचेतय्गु न्ह्यःने हे पंचायत शासनया विरोध यानादीम्ह पद्मरत्नया उगु इलयया चुनावी गतिविधिइ सांगीतिक पक्षमा बारे कुलाः उगु इलय् चुनाव प्रचारया नितिं दयेकादीगु म्ये नं न्यंकादीगु खः ।
ज्याझ्वलय् ईमेज च्यानलया हे मेगु नेपालभाषाया ज्याझ्वः ख्वताबजि पुचःया भोगेन्द्र मानन्धरं कालभैरव चचा प्याखं न्ह्यब्वःगु खःसा पवित्र कसाः व जुजुकाजी रंजितं हालादीगु म्येय् च्वमि राजभाई जकःमि कविता पाठनापं यानाः न्हूपहलं “देय् जवाः अय् पद्मरत्न” कविता हना म्ये न्ह्यब्वःगु खः ।
ज्याझ्वः सुरजवीर बज्राचार्यं न्ह्याकादीगु खः ।
 

 

Categorized in राष्ट्रिय