पारस खड्कां अन्तर्राष्ट्रिय क्रिकेटं संन्यास काल
दिल्लागा दशमी ११४१,साउन १९ मंगलबाः
नेपाली क्रिकेटया दकले ताःलाःम्ह कासामि पारस खड्कां अन्तर्राष्ट्रिय क्रिकेटं संन्यासया घोषणा यानादीगु दु ।
राष्ट्रिय क्रिकेट पुचःया पूर्व कप्तान तकं खःम्ह खड्कां थौं सुथय् सामाजिक सञ्जालय् हसना सार्वजनिक यानाः थःम्हं अन्तर्राष्ट्रिय क्रिकेटं सन्यास कायेगु घोषणा यानादीगु खः ।
सन् २००४ य् १५दँय् अन्तर्राष्ट्रिय क्रिकेटय् नेपालं डेब्यु याःम्ह खड्कां ताःई नेपाली राष्ट्रिय पुचलय् कप्तान जुयादीगु दु । वय्कया हे कप्तानीइ नेपालं अन्तर्राष्ट्रिय क्रिकेटय् विश्वकप म्हितूगुनिसें एक दिवसीय मान्यता तकं चूलाकूगु खः ।
देय्या नितिं थ्यंमथ्यं १७दँ तक अन्तर्राष्ट्रिय क्रिकेट म्हितूम्ह वय्कलं ताःलाःम्ह अलराउन्डरया रुपय् थःत म्हस्यूगु दु । एसोसिएट क्रिकेटया स्टार कासामिया कथं खड्कां छुंया ल्याखय् विदेशी फ्रेञ्चाइज लिगय् तकं म्हितेधुंकूगु दु ।
अन्तर्राष्ट्रिय क्रिकेटं सन्यास घोष्णा याःसां वय्कलं घरेलु धेंधेंबल्लाय् धाःसा म्हितेफइगु छुमां क्यनादीगु दु ।
Categorized in कासा
