पूर्व प्रहरी खरेलयात पूर्पक्षया नितिं थुनाय् तयेत उजं
लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः
राष्ट्रिय अनुसन्धान विभागया पूर्वप्रहरी राजु (भुवन) खरेलयात पुर्पक्षका नितिं थुनाय् तयेत अदालतं उजं ब्यूगु दु ।
छेँय् ज्या याइम्ह मिसाया ७दँ दुम्ह म्ह्याय्मचायात बलात्कार याःगु द्वपंयात कयाः सुनुवाई यासें जिल्ला अदालत, येँपाखें खरेलयात पूर्पक्षया नितिं थुनाय् तयेत सोमवाः उजं ब्यूगु खः ।
अदालतया उजं लिपा खरेलयात केन्द्रीय कारागार, जगत्राथ देवल चलान याःगु महानगरीय प्रहरी बृत्त, बानेश्वरया प्रमुख डिएसपी गोविन्दराज काफ्लें जानकारी बियादीगु दु ।
खरेल विरुद्ध बैशाख १८ गते मिसामचाया मांम्हेस्यां किटानी जाहेरी ब्यूगु खः । खरेलया छेँजःपिन्सं उगु द्वपंयात अस्वीकार याःसां नं खरेलं धाःसा प्रहरीलिसेया बयानय् कसूर स्वीकार याःगु खः ।
