पेट्रोलियम पदार्थय् थाहांवंगु भावं लाकीगु लिच्वः
जुजुमान महर्जन
नेपाल आयल निगमं पेट्रोलियम पदार्थया भाः वंगु सञ्चरवाः चान्हय्निसें लागू जुइकथं थकाःगु खः । ओली सरकार वय्धुंकाः मूल्य समायोजनया नामय् भाः थकाःगु थ्व प्यक्वःखुसी खः । लिपांगु भाःयात विश्लेषण याय्बलय् मूल्य समायोजनया नामय् थकाःगु भाः अस्वभाविक खनेदु ।
नेपाल आयल निगम तसकं घाटाय् वंगु धकाः वंगु २०७१साल असोजंनिसें स्वचालित मूल्य लागू याःगु खः । अन्तराष्ट्रिय बजारय् घटबढ जुइगु भाःकथं हे नेपालय् नं भा थाहांकुहां जुइगु खः । तर आयल निगमं झिंन्यान्हु न्ह्यः मूल्य समायोजन याःगु इलय् अन्तर्राष्ट्रिय बजारय् कच्चा चिकंया भाः छगू ब्यारेलया ७८.२८ डलर थ्यनाच्वंगु खःसा वंगु सञ्चरवाः मूल्य समायोजन याःगु इलय् अन्तर्राष्ट्रिय बजारय् छगू ब्यारेलया ६५.८१ डलर थ्यनाच्वंगु खः ।
तर नेपालय् पेट्रोलियम पदार्थया भाः धाःसा पेट्रोल, डिजेल व मचिकनय् स्वतका स्वतका थकाल । अन्तर्राष्ट्रिय बजारय् चिकंया भाः कुहां वयाच्वंगु इलय् नेपालय् अस्वभाविकरुपं भाः थाहांवंगुयात छु धाय्गु ?
नेपाल आयल निगमं न्ह्याबलें घाटाया त्वहः तयाः पेट्रोलियम पदार्थया भाः थकाय्गु याना वयाच्वंगु दु । छगू इलय् निगम घाटाय् दुसा नं बोनस नय्गु तयारी याःगु निगमया निर्णययात कयाः सर्बोच्चं तक बोनसयात कयाः आदेश जारी याय्माःगु खः । थजाःगु मनस्थितिं न्ह्यानाच्वंगु निगमं अन्तर्राष्ट्रिय बजारय् चिकंया भाः कुहांवनाच्वंगु इलय् थुकथं भाः थकाय्गु गुलि जाय्ज खः ? थुकिं नेपाःमितय्गु जनजीवनय् गजाःगु लिच्वः लाइगु खः ? थुकियात कयाः गबलें नं विश्लेषण याःगु मदुनि ।
पेट्रोलियम पदार्थया भाः थकाय्वं सार्वजनिक यातायातया भाँडा थाहां वनीगु अस्वभाविक मखु । सर्वसाधारण फयाच्वंगु खायुगु सत्य थ्व नं खः कि पेट्रोलियम पदार्थया भाः थाहां वनीगु इलय् सार्वजनिक यातायातय् थकाइगु भाः पेट्रोलियम पदार्थया भाः कुहांवनीगु इलय् नं उलि हे भाः जुयाच्वनी । यातायातया भाः क्वकाय्गु नितिं कि सरकारं हे ख्याच्वः बीमाः कि आन्दोलित हे जुइमाः ।
मेखे भाः थाहांवनीगु अवस्थाय् हरेक सामानलिसें नसाज्वलंत ढुवानी याइबलय् थुकिया लिच्वः नसाज्वलनय् नं लाइगु स्वभाविक खः । निगमं आन्तरिक हवाइ इन्धनय् छगू लिटर पेट्रोलय् न्यातका थकाय्वं हवाइ भाँडाय् २२०तका तक थकाय् धुंकूगु दु । थुकियात लिच्वः विशेष यानाः पहाडी दुर्गम जिल्लाया जनतातय्त लाइगु खः ।
अथे हे पेट्रोलियम पदार्थय् भाः थाहांवनेवं उद्योगतय्गु उत्पादन लागतय् नं लिच्वः लाइगु स्वाभाविक खः, गुकिया लिच्वः प्रत्यक्षकथं उपभोक्तातय्त लाःवनीगु खः ।
अथे हे निगमं भारतय् पेट्रोलियम पदार्थ तस्करी जुयाच्वंगु खँयात न्ह्यःने तय्गु यानाच्वंगु दु । तर थुकियात नियन्त्रण याय्गु ज्या धइगु सरकारयागु खः ।
अन्तर्राष्ट्रिय बजारय् चिकंया भाः कुहां वनाच्वंगु इलय् थजाःगु तर्क तयाः थकाःगु भावं जनतायात जक हानी जुइगु खः ।
