२०७७ माघ ५, सोमबार

प्रधानमन्त्री ओली व इजरायलया राष्ट्रपति दथुइ टेलिफोन सम्वाद

विकाश | बछलाथ्व सप्तमी ११४०

प्रधानमन्त्री केपी शर्मा ओली व इजरायलया राष्ट्रपति रुभेन रुबि रिभ्लिन दथुइ टेलिफोन सम्वाद जूगु दु । थौं न्हिनय् ३ः४५ताः ईपाखे नेपाली प्रधानमन्त्री व इजरायली राष्ट्रपति दथुइ करीब २० मिनेट टेलिफोन संवाद जूगु खः । 
 
प्रधानमन्त्री ओलीं ट्वीटरय् ट्वीट यासें निम्ह दथुइ टेलिफोन सम्वाद जूगु जानकारी बियादीगु खः । ट्वीटय् च्वयातःगु दु, ‘थौं जिगु इजरायलया महामहिम राष्ट्रपति रुभेन रुबि रिभ्लिनलिसे टेलिफोन संवाद जुल । जिं अन दुपिं नेपालीया सुरक्षा व कल्याणया बारे च्यूताः तया । वयकलं नेपालीत थः हे थें च्वनाच्वंगु जुयाः चिन्ता मकायेत धयादिल ।’
 
 
संवादया झ्वलय् प्रधानमन्त्री ओलीं इजरायलं कृषि लगायत थीथी ख्यलय् याःगु अभूतपूर्व प्राविधिक विकासयात च्वछासें कृषि प्रधान देय् नेपालय् उगु प्रविधित दुतहयेत इजरायल सरकारया ग्वाहालिया अपेक्षा न्ह्यब्वयादिल । 
 
रुभ्लिनं नेपालयात माःगु ग्वाहालि यायेगु प्रतिवद्धता प्वंकादीगु खः ।
 
इजरायलया लागिं नेपालया राजदूत डा. अन्जान शाक्यं नेपालय् कृषि ख्यःया विकास यायेत व इजरायली प्रविधि नेपालय् दुतहयेत नेपालय् Agriculture Center of Excellence चायेकेत निगू देय् दथुइ सम्झौता यायेत माःगु प्रक्रिया लिपांगु चरणय् थ्यनेधुंकूगु प्रधानमन्त्री ओलीयात थ्वयां न्ह्यः हे जानकारी याकाद्यूगु खः । 
 
अथे हे, शिक्षा, स्वास्थ्य, विज्ञान प्रविधि, कला, संस्कृति, पूर्वाधार विकास, व्यापार व्यवसाय आदि थीथी मेगु विषयस नं थीथी सम्झौता जुइधुंकूगु नं राजदूत डा. शाक्यं कनादीगु खः ।
 
सम्वादया हे झ्वलय् प्रधानमन्त्री ओलीं इजरायलया ७२क्वःगु स्वतन्त्रता दिवसया भिन्तुना नं बियादीगु खः । अथे हे, नेपाल व इजरायलया दौत्य सम्बन्ध स्थापना जूगु ६०दँ थ्यंगुया भिन्तुना नं ब्युसें निगू देय्या स्वापू अझ दुग्यनावनीगु विश्वास राष्ट्रपति रुबेन अले प्रधानमन्त्री ओलीं प्वंकादीगु खः । 
 
प्रधानमन्त्री ओली व इजरायलया राष्ट्रपति दथुइ संवाद याकेत नेपाली राजदुतावासं दक्वं प्रवन्ध ताःलाकूगु स्रोतं धाःगु दु ।
 
थ्वयां न्ह्यः नं दूतावासया समन्वयस प्रधानमन्त्री ओली व साइप्रसया राष्ट्रपति दथुइ संवाद जूगु खः ।
Categorized in राजनीति