प्रधानमन्त्री देउवाया आह्वानय् थौं सर्बदलीय मुँज्या च्वनिगु
ञलागा नवमी ११४१, असोज १४ विहीबाः
प्रधानमन्त्री शेरबहादुर देउवां थौं सर्वदलीय मुँज्या आह्वान यानादीगु दु ।
संसदय् मदिक्क अवरोध जूगु विषयलय् सहलह यायेत प्रधानमन्त्री देउवां थौं सुथय् १०ताः ईलय् च्वनेगु कथं सर्वदलीय मुँज्या सःतादीगु खः । मुँज्या प्रधानमन्त्री निवास बालुवाटारय् च्वनी ।
संसदय् दुथ्याःगु न्यागू दलत मध्ये नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी व राष्ट्रिय जनमोर्चा सत्ता गठबन्धनय् दु ।
मुँज्याय् इपिं बाहेक संसदया प्रमुख प्रतिपक्षी नेकपा एमाले, लोकतान्त्रिक समाजवादी पार्टी (लोसपा), नेकपा मजदुर किसान पार्टी (नेमकिपा) व राष्ट्रिय प्रजातन्त्र पार्टी (राप्रपा)यात सःतातःगु दु ।
नेकपा एमालेया १४म्ह सांसदतय्त पदं बर्खास्त यायेमाःगु माग तयाः एमालें वंगु भदौ २३ गतेनिसें संघीय संसदया मुँज्याय् मदिक्क अवरोध यानावःगु दु ।
तर, माधव कुमार नेपाललिसे इपिं सांसदतय्सं नेकपा एकीकृत समाजवादी पार्टी हे चायेकेधुंकूगु दु । संसदया गतिरोध चायेकेत सभामुख अग्नीप्रसाद सापकोटां न भदौलय् सर्वदलीय मुँज्या सःतादीगु खः ।
Categorized in राजनीति
