प्रधानमन्त्री सभाहल निरीक्षण यायेत गोदावरी थ्यन
नृपेन्द्रलाल श्रेष्ठ | कौलागा पारु ११४०,कार्तिक १६ आइतवाः
प्रधानमन्त्री केपी शर्मा ओलीं गोदावरीया सभा हल अवलोकन याःगु दु। थौं न्हिनय् शहरी विकास मन्त्री कृष्णगोपाल श्रेष्ठ नाप उगु हल ज्या जुया वयाच्वंगु प्रगति विवरण बारे जानकारी कायेत आकाझाकां गोदावरी थ्यःगु खः।
उगु झ्वलय् वयकलं आःतक जुया वया ज्याया प्रशंसा यासे स्वलाया दुने सम्पन्न यायेत निर्देशन बियादिगु दु। अवलोकन यायेगु झ्वलय् वयकलं हल याकन हे सम्पन्न याना महत्वपुर्ण ज्याझ्वः थुगु हे हलय् याये कथं तयारी यायेत इनाप यानादिगु खः।
उगु झ्वलय् शहरी विकास मन्त्री श्रेष्ठं नेकपाया सरकार बने जूगु स्वदँ थ्यःगु दिं थ्व हे वइगु फागुन ३ गते उलेज्या याये कथं तयार यायेत निर्देशन बियादिगु दु। माघ तक सम्पन्न याना फागुन ३ गते उलेज्या यायेत व्यवस्था मिले यायेत शहरी विकास तथा भवन निर्माण विभागया अधिकारीपिन्त निर्देशन बियादिगु खः।
मन्त्रीया धारणा न्यने धुका प्रम ओलीं शहरी विकास मन्त्री श्रेष्ठया निर्देशन कथं प्रगति विवरण तयार यायेत निर्देशन बियादिगु खः।
२०७६ असोज २० गते निसे निर्माण ज्या न्ह्यागु थुगु हल थ्व हे २७ गते दुने सम्पन्न याये माःगु सम्झौताय् उल्लेख दु । करिब ४३ रोपनी क्षेत्रफलय् निर्माणाधिन जूगु थुगु हल केसी–समानान्तर जेभिं ५८ करोड २४ लाख रुपिया ठेक्का काःगु खः।
अवलोकन यायेत प्रम ओली नाप वयकया जहान राधिका शाक्य, सांसद नवराज सिलवाल, प्रमया प्रमुख सल्लाहकार विष्णु रिमाल, विदेश मामिला सल्लाहकार राजन भट्टराई, प्रेस सल्लाहकार सुर्य थापा, शहरी विकास मन्त्रालयया सचिव डा. रमेशकुमार सिंह नेकपा यलया अध्यक्ष हरिकृष्ण ब्यञ्जनकार लगायतपिं न गोदाबरी सभाहलय् थ्यःगु खः।
