प्रिमियर लिगय् सिटी त्यात
थिंलागा पारु ११४२, पुष ५ सोमवाः
इंग्लीश प्रिमियर लिग फुटबलय् म्यान्चेस्टर सिटीं न्युकसाल युनाइटेडयात ४–० गोल अन्तरं बुकूगु दु ।
न्युकासल युनाइटेडया मैदानय् जूगु कासाय् म्यान सिटीयात त्याकेबीत रुबेन डियास, हुँवा क्यान्सेलो, रियाद माहारेज व राहिम स्टर्लीङं छगोल छगोल याःगु खः ।
१८गू कासापाखें म्यान सिटीया ४४गु ल्या दु । लिभरपुलया ४१गू ल्या दुसा चेल्सीया ३८गू ल्या दु । वंगु चान्हय् जूगु कासाय् लिभरपुल व टोटनह्याम हट्सपरं २–२ गोलया ज्वलिंज्वः कासा म्हितूगु दु ।
कासाय् टोटनह्यामया ह्यारी केन व सन ह्युङ मिनं छगोल छगोल याःसां लिभरपुलया डिएगो योटा व एण्डी रोबर्टसनं निगोल नकूगु दु ।
वंगु चान्हय् हे जूगु मेगु कासाय् चेल्सीं वुल्भरह्याम्पटन वान्डरर्सनाप गोलरहित ज्वलिंज्वः कासा म्हितूगु दु । एभर्टन व लेष्टर सिटीदथुइया कासा धाःसा कोभिडया हुनिं रद्द जूगु दु ।
Categorized in कासा