प्रेम मोहन सिरपाः मल्लयात लःल्हात
लहनान्युज | यंलागा चौथी ११३९ (सेप्तेवर १८ २०१९)
भाषा थुवाः प्रेम बहादुर कसाःया लुमन्तिइ इ. मोहन कृष्ण डंगोलं नेपालभाषा ख्यलय् च्वमिपिन्त हःपाः बिइगु तातुनाः थीथी बिधाय् निदँय् छक्वः छम्हेसित सिरपाः बिइगु याना वयाच्वंगु झ्वलय् थुगुसी उपन्यास बिधाय् मल्ल के सुन्दरया च्वसां पिदंगु ‘द पोष्टर’ नांगु उपन्यासयात येँया खुसिबुँइ झःझः धायेक ज्याझ्वः यासे च्वमि मल्लयात सिरपा व दां लःल्हाःगु दु ।
प्रेम–मोहन सिरपाः गुथिया ग्वसालय् बंशी कृष्ण डंगोलया सभाध्यक्षताय् जुगु ज्याझ्वलय् पवित्र कसां नं न्ह्याकादीगु उगु ज्याझ्वलय् मूपाहाँ शताब्दी पुरुष सत्यमोहन जोशी सच्छिदँ क्यंगु लसताय् हने ज्या याःगु खः ।
ज्याझ्वलय् रेणु बास्कोलां लसकुस न्वचू मथुरा सायमिं संस्था व सिरपाःयात कयाः नुगःखँ तयादीगु खःसा स्नेह सायमिं च्वमि मल्लया सिरपाः त्याकूगु सफू खस भाषं अनुवादयाना बलय् थःयात ताःगु नुगःखँ तयादीगु खः ।
नुगःखँ तयेगु झ्वलय् थम्हं च्वयागु उपन्यासयात सिरपाः लाःगुखँय् थःअतिकं लय्ताःगु खँ कनादिसे तर थम्हं गुबलय्नं सिरपाः त्याकेगु नितिं आशाकुति मजुयागु नं धयादिल । थम्हं च्वयागु
सफुतिं नेपालभाषाया थपू नापं सकल नेवाःतय् नुगलय् थी फयेमा धैगु बिचाः यानागु खँ कनादिल ।
बुखँ–नेवाः सूचना केन्द्र
किपा– राजेन्द्र रञ्जित
