फिफा वरीयताय् नेपालया सुधार
लहनान्यूज | चिल्लाथ्व द्वादशी ११३७ (मार्च ९ २०१७)
विश्व फुटबलया वरीयता झ्वलय् नेपाल स्वत्वाथः थहांवंगु दु ।
विश्व फुटबलया सर्वोच्च निकाय फिफां थौं जारी याःगु न्हूगु वरीयता झ्वलय् नेपाल १७० थासय् लात । थ्वयां न्ह्यः नेपाल १७३ थासय् दुगु खः ।
नेपाःया जःलाखला देय् भारत दक्षिण एसियाय् शीर्ष थासय् दुसा माल्दिभ्स निगूगु अले अफगानिस्तान स्वंगूगु थासय् दु । थुगु स्वंगू देय् विश्व वरीयताय् छसिकथं १३२, १४० व १५६ थासय् दु ।
दक्षिण एसियाया वरीयत झ्वलय् नेपाल प्यंगूगु अले भुटान, बंगलादेश, श्रीलंका व पाकिस्तान दु । विश्व वरीयताय् भुटान १७७, बंगलादेश १९३, श्रीलंका १९७ व पाकिस्तान १९८ थासय् दु ।
विश्व वरीयताय् न्हापांगु ल्याखय् अर्जेन्टिना, ब्राजिल निगूगु व जर्मनी स्वंगूगु ल्याखय् कायम दु ।
Categorized in कासा
