फिलिपिन्सं यात्रा प्रतिबन्ध चिइकल
गुंलागा द्वादशी ११४१, भाद्र २० आइतबाः
फिलिपिन्सं नेपाः लिसें १०गू एशियाली देय्यात तयावःगु यात्रा प्रतिबन्ध चिइकुगु दु ।
कोभिड महामारी नियन्त्रणया धका नेपाल, भारत, पाकिस्तान, बंगलादेश, श्रीलंका, संयुक्त अरब इमिरेट्स (यूएई), ओमान, थाइल्याण्ड, मलेसिया व इन्डोनेसियायात प्रतिबन्ध तःगु खः ।
कोरोना संक्रमण नियन्त्रण मजूसा नं खोपया हुनिं ग्यानापूगु अवस्था मजुइगु निश्कर्ष लिसें सेप्टेम्बर ६ निसें यात्रा प्रतिबन्ध चिइकेगु निर्णय जूगु फिलिपिन्स सरकारं न्ह्यथंगु दु ।
फिलिपिन्सया राष्ट्रपति रोड्रिगो डुटेर्तें यात्रा प्रतिबन्ध चिइकेत अन्तर निकाय कोभिड–१९ कार्यदलया सिफारिस स्वीकृत जूगु जानकारी बियादील ।
अयेसां फिलिपिन्स वइपिं अन्तर्राष्ट्रिय यात्रुतयेसं प्रवेश, परीक्षण व क्वारेन्टिनसम्बन्धी नियम धाःसा पालना यायेमाःगु न्ह्यथंगु दु । फिलिपिन्सं १०गू एशियाली देय्यात वंगु अप्रिल निसें प्रतिबन्ध तःगु खः ।
Categorized in अन्तर्राष्ट्रिय
