फुक्क छनोट कासा अनिश्चितकालया नितिं स्थगित : एएफसी
एशियाली फुटबल महासंघ (एएफसीं) कोरोना भाइरसया हुनिं मे व जुन महिनाया नितिं क्वःछिनातःगु फुक्क कासा अनिश्चितकालया नितिं स्थगित याःगु दु ।
 
एएफसीं मेगु सूचं पिमथंतलय् उगु कासा स्थगित याःगु खः ।
 
थ्वया नापनापं विश्वकप छनोट–२०२० व एएफसी एशियन कप छनोट–२०२३ अन्तर्गत नेपाः व जोर्डन दथुइ येँया दशरथ रंगशालाय् वयगु जुइ ४या नितिं क्वःछिनातःगु कासा नं स्थगित जूगु दु । मेगु निलाया कासा स्थगित जुइवं एएफसीया प्यलाया कासा धलखय् लिच्वः लाःगु दु ।
 
एएफसीं थ्व स्वयां न्ह्यः मार्च व अप्रिलया नितिं क्वःछिनातःगु फुक्क कासा स्थगित याःगु खः । छनोट अन्तर्गत ‘समूह बी’या खुगूगु व न्हय्गूगु चरणया कासा नेपालय् जुइगु क्वःछ्यूगु खः । गुकी नेपालं चाइनिज ताइपेइलिसे चैत्र १३गते व अष्ट्रेलियालिसे चैत्र १८ गते दशरथ रंगशालाय् म्हितकेगु कासा स्थगित जूगु खः ।
 
छनोट कासा अन्तर्गत ‘समूह बी’इ न्यागू कासा म्हितूगु नेपालं स्वंगू ल्याः जक कायेफूगु खः । चाइनिज ताइपेइयात बुकूगु नेपाल ‘समूह बी’इ प्यंगूगु थासय् लानाच्वंगु दु ।
 
१२गू ल्याः काःगु अष्ट्रेलिया शीर्ष स्थानय् लानाच्वंगु दुसा १०गू ल्याः दयेकूगु कुबेत निगूगु थासय् दु । अथे हे १०गू हे ल्याः दयेकूगु जोर्डन स्वंगूगु थासय् लानाच्वंगु दुसा छगू हे ल्याः कायेमफूगु चाइनिज ताइपेइ दकलय् ल्यूने लानाच्वंगु दु ।
Categorized in कासा