बजेट प्रतिनिधिसभां बहुमत पारित
वइगु आर्थिक वर्ष २०७७ व ०७८ या लागि सरकारं पेश याःगु (विनियोजन विधेयक) बजेट प्रतिनिधिसभां बहुमत पारित याःगु दु ।
 
जेठ १५ गते संघीय संसदया मंकाः बैठकय् अर्थमन्त्री डा. युवराज खतिवडा वइगु आर्थिक वर्षया लागि १४ खर्ब ७४ अर्व ६४ करोडया बजेट पेश याःगु खः ।
 
उगु बजेट बुधवाः अर्थमन्त्री खतिवडा पारित यायेगु लागि प्रस्ताव प्रस्तुत याःगु खः । थुगु बजेत प्रतिनिधिसभां बहुमत पारित याःगु दु । बजेटया पक्षय् सत्तारुढ नेकपा सांसदया जक मत बिःगु खः ।
 
कोरोना भाइरस महामारीउा कारण आगामी आर्थिक बर्षया लागि बजेट बच्छि घटे जूगु दु । चालु आर्थिक वर्ष २०७६÷७७ या लागि सरकारं १५ खर्ब ३२ अर्ब व ९६ करोडया बजेट हःगु खः ।
 
प्रतिनिधि सभापाखे बहुमत पारित जूगुलि बजेट राष्ट्रिय सभाय् न पारित यायेमा । राष्ट्रियसभाय् प्रतिननिधि सभा थे मन्त्रालय न उगु शीर्षकय् छलफल जुइ । सम्बन्धित मन्त्रीं लिसः बिइ धुका बजेट पारित याइ ।
 
संघीय संसदया निगु सदनं पारित लिपा न्हुगु आर्थिक वर्षया बजेट खर्च यायेत सरकारयात लँ चाइ ।
 
थ्व नाप सरकारं संसदय् पेस याःगु आर्थिक विधेयक, राष्ट्र ऋण उठे याःगु विधेयक ऋण तथा जमानत सम्बन्धी आश्रित विधेयक पारित याना प्रतिनिधि सभां राष्ट्रिय सभाय् छ्वइ । राष्ट्रिय सभां पारित याये धुका बजेट पूर्ण रुपं पारित जूगु माने याइ।
 
खर्च कटौती प्रस्ताव अस्वीकृत
 
आगामी आर्थिक बर्षको बजेटया थीथीे मन्त्रालयत शीर्षकय् सांसदपिन्स २६गू खर्च कटौती प्रस्ताव याःगु दु । दक्को खर्च कटौती सम्बन्धी प्रस्ताव सदनय् निणयार्थ प्रस्तुत याःगु इलय बहुमत अस्वीकृत जूगु खः ।
 
सांसदपि दुर्गा पौडेल, पुष्पा भुसाल, प्रेम सुवाल, उमा रेग्मी, सञ्जयकुमार गौतम, उमाकान्त चौधरी, लक्ष्मी परियार, सुजाता परियार, रंगमती शाही, मिनेन्द्र रिजाल, प्रदीप यादव, बहादुर सिंह लामा, रामबाबु कुमार यादव, डिला संग्रौला, राजेन्द्र केसी, देवेन्द्रराज कंडेल, मीनबहादुर विश्वकर्मा, पार्वती डीसी चौधरी, पद्मनारायण चौधरी, ज्ञानेन्द्रबहादुर कार्की, गगन थापा, अतहर कमाल मुसलमान, नारायण खड्का, दिलेन्द्रप्रसाद बडू, भीमसेनदास प्रधान व प्रकाशमान सिंह न खर्च कटौती सम्बन्धी प्रस्ताव पेश याःगु खः ।
 
Categorized in राजनीति