बागमती प्रदेश नामांकन विरोध
लहनान्युज | पोहेलाथ्व पंचमी ११४० (दिसेम्वर ३१ २०१९)
नेपाल कम्युनिष्ट पार्टी (नेकपा)या सचिवालय मुँज्यां ३ नम्बर प्रदेशया नां बागमती प्रदेश व राजधानी हेटौंडा हे कायम यायेगु निर्णय विरुद्ध नेवाःतसें नेकपाया उगु निर्णय पूर्ण रुपं अधिनायकवादी, असंवैधानिक व अप्रजातान्त्रिक जूगु धासें उगु निर्णय तत्काल लितकायेत माग याःगु दु । लिसें थ्वः मागयात बेवास्ता यात धाःसा वइगु दिं वइगु असहज परिस्थितिप्रति नं सचेत याःगु दु ।
मंगलवाः सुथय् येँया नेपाः ब्यांक्वेटय् नेवाः न्ह्यलुवाः मल्ल के. सुन्दर, डा. महेशमान श्रेष्ठ, दिलीप महर्जन, चन्द्र महर्जनलिसें थीथी नेवाः संघसंस्था व नेवाः आन्दोलनय् आवद्ध ब्यक्तिपिनिगु विरोधभेलां विरोध वक्तव्य पिथनाः थथे ख्याच्वः ब्यूगु खः ।
थथे पितब्यूगु वक्तव्यय् सत्तारुढ नेपाल कम्युनिष्ट पार्टी (नेकपा)या सचिवालय बैठकं जनताया अपेक्षा अःखः ३ नम्बर प्रदेशया नां बागमती प्रदेश तयेत प्रदेश सरकारया प्रमुखयात निर्देशन ब्यूगु खँय् नेवाः समुदायया गम्भीर ध्यानाकर्षण जूगु खँ न्ह्यथनातःगु दु ।
उगु वक्तव्यय् धयातःगु दु, ‘नेवाः समुदायपाखें ताःई न्ह्यवःनिसें संघीयता दुने नेवाः स्वायत्त राज्यया माग यानाः थीथी चरणया आन्दोलन यानाः वयाच्वंगु खः । अथेहे, नेवाः व तामाङपिनिगु इतिहास, सभ्यता व बसोबासया लागा कःघाःगु ३ नम्बर प्रदेशया नां नेवाः ताम्सालिङ प्रदेश कथं जुइमाःगु खँ तयाः नेवाः व तामाङपिन्सं थीथी चरणया संघर्ष व अभियान न्ह्याकाः वयाच्वंगु खः । लिसें प्रदेशसभाय् थुगु प्रदेश दुने विकसित ऐतिहासिक सभ्यताया आधारय् नेवाः ताम्सालिङ प्रदेश, नेपाल मण्डल प्रदेश लगायत थीथी नां तयेगु प्रस्ताव दर्ता जुयाच्वंगु खः । तर
प्रदेशसभाय् सहलह यायेगु अवसरयात हस्तक्षेप यायेगु कथं पार्टीं ब्यूगु निर्देशन संघीयताया मान्यता व लोकतान्त्रिक विधि प्रक्रिया अःखः ज्या खः ।’
पिदंगु वक्तव्यय् धयातःगु दु, ‘नेपाल कम्युनिष्ट पार्टी (नेकपां) बागमती प्रदेश नां तयेत ब्यूगु निर्देशन तुरुन्त लितकायेत जोडदार अपील यानाच्वना । अथे मजुल धाःसा वइगु असहज
परिस्थितिप्रति सचेत यानाच्वना ।’
३ नम्बर प्रदेशया नां पहिचान कथं नामांकन जुइमाःगु धासें सार्वजनिक जूगु वक्तव्यय् नेवाः पहिचान व अधिकारया नितिं न्ह्याइगु आन्दोलनय् ऐक्यबद्धता व समर्थन यायेत सकलसित इनाप नंं यानातःगु दु ।
अथेहे, थौं जूगु भेलाय् नेवाः न्ह्यलुवाः मल्ल के. सुन्दरं बागमती प्रदेश नामांकन विरुद्ध आन्दोलन न्ह्याकेगु नितिं तत्काल ३ नम्बर प्रदेशसभाया पहिचान पक्षधर दुजःपिं नाप मुँज्या च्वनेमाःगु, नेकपाया नायः पुष्पकमल दाहाल प्रचण्ड नापलानाः झीगु धारणा स्पष्ट यायेमाःगु, अथेहे ३ नम्बर प्रदेशा मुख्यमन्त्री व सभामुखपिन्त नापलानाः पार्टीं संघीयताया धर्म व मर्म अःखः ब्यूगु उजंयात कयाः सहलह ब्याकेमाःगु व थ्वहे पुस १९ गते झिक्वःगु नेवाः एकता दिवस बागमती प्रदेश नामांकन यायेत्यंगु विरुद्ध शक्ति प्रदर्शन कथं हनेमाःगु प्रस्ताव तयादीगु खःसा उगु प्रस्तावयात सर्वसम्मतिं पारित याःगु खः ।
