२०८१ आषाढ ११, मंगलबार

बुंगद्यःया जात्रा, गाःबहाः याः न्यात

लहनान्यूज | बछलाथ्व पंचमी ११३७ (अप्रिल ३० २०१७)

नेपाःया दक्कले ताःहाकःगु जात्रा कथं काइगु बुंगद्यःया रथजात्राया थौं न्हापांगु दिं, गाःबहाः याः न्याःगु दु ।
 
थौं रथजात्राया न्हापांगु दिनय् बुंगद्यःया रथयात यलया पूच्वं सालाहयाः गाःबहाः थ्यंकाः याः न्यायेकूगु खः । 
 
रथ सालेगु झ्वलय् पूच्वया मोडतक्क से से जक धयाः हःपाः बीगु याइ । मेमेगु रथजात्राय् हःसे हैसे धाइगुलिइ बुंगद्यःया रथ जात्राय् थुकथं सेसे धायेगु छगू बिस्कं चलन खनेदु ।
 
आः रथजात्राया झ्वलय् छसिकथं नुगलय् नुगःयाः, लगंयाः धुंकाः याकः मिसा भुज्याः न्यायेकी । वयां लिपा साइत कथं जाउलाख्यलय् रथ थ्यंकेधुंकाः जाउलाजात्रालिसें जात्रा क्वचाइ ।
 
 
येँया बन्धुदत्त आचार्य, यलया रथचक्र भल्या व ख्वपया नरेन्द्रदेव जुजु जानाः बुंगद्यःयात कामारु कामाक्षं येँय् हःगु विश्वास याइ ।
 
व हे कथं गाःबहाःयाःयात येँयाम्ह बन्धुदत्तयागु याः, नुगःयाःयात ख्वपया नरेन्द्रदेव जुजुया याः व लगंयाःयात यलया रथचक्र भल्याया याः कथं कायेगु याइ ।
 
वा व सहकालया द्यः बुंगद्यःया रथजात्रा बांलाक क्वचाःसा देशय् वा बांलाक वयाः बालीनाली बांलाइगु अले अनिकाल मजुइगु जनविश्वास दु ।
 
नेवाः भुमिया स्थानीय द्यः बुंगद्यःयात वौद्ध धर्मामलम्बितयसं आर्यावलोकितेश्वर, शैवतयसं शिव, नाथ सम्प्रदायिं मत्स्येन्द्रनाथ, वैष्णवतयसं विरंचि नारायण, शाक्ततयसं शक्ति कथं पुज्यायेगु याइ ।
Categorized in राष्ट्रिय