ब्राजिलय् कोरोनाया हुनिं सीपिनि ल्याः ५गू लख थ्यन
बछलाथ्व दशमी ११४१, असार ६ गते आइतबाः
कोरोना महामारीया हुनिं ब्राजिलय् सीपिनि ल्याः ५गू लख पुलावंगु दु ।
थगुने कोरोना महामारी न्ह्यागु थुखे दक्वःलय् आपा सीपिं मध्ये ब्राजिल निगूगु देय् खः । कोरोनाया खोप प्रभावकारी कथं वितरण जुइ मफूगुलिं ब्राजिलय् सीपिनि ल्याः अझं अप्वय्फइगु अधिकारीतयेसं ख्याच्वः बिउगु दु ।
आःतक्क १५गू प्रतिशत नागरिकं जक खोप काःगु अनया अधिकारीतयेसं न्ह्यथंगु दु । राष्ट्रपति जायर बोलसनोरों कोरोनापाखें ल्यनेत सरकारं जारी याःगु स्वास्थ्यया मापदण्ड पालना यायेत चिउता मक्यंगुलिं संक्रमण तच्वकं न्यंगु गुलिखय्सिनं द्वपं बिउगु दु ।
महामारी नियन्त्रणया नितिं प्रभावकारी पलाः न्ह्याके मफूगु धका विपक्षी दलतयेसं सरकारया तच्वकं कुँख्यंगु दु । अथेहे सरकारं खोप खरिदया प्रक्रिया न्ह्याकेत लिबाकुगु धासें राष्ट्रपतिया कुँख्यंगु दु । वंगु वालंनिसें ब्राजिलय् न्हिं ७०द्वः सिवें आपा संक्रमित थप जुयावःगु दु । संक्रमितया ल्याः अप्वःगु नापं वासः यायेगुलिइ समस्या जूगु धाःगु दु ।
Categorized in अन्तर्राष्ट्रिय
