ब्राजिल कोपा अमेरिका कपया फाइनलय्
लहनान्युज | ने.सं. ११३९ दिल्लाथ्व पारु (३ जुलाइ, २०१९), बुधवाः
ग्वसाः देय् ब्राजिल कोपा अमेरिका कप फुटबलया उपाधि लिक्क थ्यंगु दु ।
थौं बुधवाः सुथय् जूगु सेमीफाइनलया न्हापांगु कासाय् चिरप्रतिद्वन्दी अर्जेन्टिनायात निगू गोलं बुकूसें फाइनलय् दुहां वंगु खः ।
कासाया न्हापांगु हाफय् छगू गोलं न्ह्यःने लाःगु ब्राजिलं निगूगु हाफय् मेगु छगू गोल याःगु खः । कासाय् ग्रावियल जिसस व राबर्टो फिरिमिनों छगू छगू गोल याःगु खः ।
कासाया १९गूगु मिनेटय् जिससया गोलपाखें सुरुवाती अग्रता काःगु ब्राजिलया नितिं फिरिमिनों ७१गूगु मिनेटय् मेगु गोल यासें ब्राजिलया जीत सुनिश्चित याःगु खः ।
तसकं धेंधेंबल्ला जूगु कासाय् अर्जेन्टिनां प्राप्त जूगु ह्वःतायात सदुपयोग याये मफूगु खः ।
आः ब्राजिलं कोपा अमेरिका कपया उपाधिया नितिं कन्हय् विहिवाः सुथय् जुइगु चिली व पेरु दथुइ जुइगु कासाया विजेतालिसे धेंधेंबल्ला याइ ।
Categorized in कासा
