भारतीय राष्ट्रपति मुखर्जीया थौं न्हिछि
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
नेपालया स्वन्हुया राजकीय भ्रमणय् दीम्ह भारतीय राष्ट्रपति प्रणव मुखर्जी थौं न्हिच्छि थीथी ज्याझ्वलय् व्यस्त जुल ।
भारतीय राष्ट्रपति मुखर्जीं थौं येँया पशुपतिनाथया दर्शन यानादिल । मुखर्जीं सुथय् जःछि वं १०ताः ईपाखे पशुपतिइ थ्यंकाः दर्शन यानादीगु खः । वय्कलं वासुकीया पूजा यानाः पशुपतिइ विशेष पूजा आराधना यानादिल ।
राष्ट्रपति मुखर्जीं करिब ४५ मिनेट बिकाः पशुपतिनाथया पूजा आराधना यानादिल । व धुंकाः वय्कलं पशुपति क्षेत्र विकास कोषया अधिकारीतलिसे छुं ई खँल्हाबल्हा नं यानादिल ।
राष्ट्रपति मुखर्जीं पशुपतिइ लाखबत्ती व पञ्चामृत अभिषेकलिसेंया विशेष पूजा यानादीगु पशुपति क्षेत्र विकास कोषं न्ह्यथंगु दु ।
पशुपतिया पश्चिम मूध्वाखां भारतीय राष्ट्रपति मुखर्जी दुहां झायेधुंकाः नेपाल वेद विद्याश्रमया १०८ वटुकं वय्कःयात लसकुस यासें विशेष स्वस्ति वाचन याःगु खः । वय्कःयात लसकुस यायेत धिमय् बाजं, पञ्चेबाजं लिसेंया बाजंगाजं अले मौलिक धुन न्ह्यब्वःगु कोषं न्ह्यथंगु दु ।
येँ महानगरपालिकां ताःचा लःल्हात
येँ महानगरपालिकां भारतीय राष्ट्रपति मुखर्जीयात नागरिक अभिनन्दन याःगु दु ।
थौं सनिलय् राष्ट्रिय सभागृहस ग्वसाः ग्वःगु विशेष समारोहस महानगरपालिकां अभिनन्दन याःगु खः । उगु इलय् महानगरपालिकाया कार्यकारी अधिकृत रुद्रसिंह तामाङ्गं मुखर्जीयात महानगरया ताःचाः लःल्हायेगुया लिसें अभिनन्दन पौ लःल्हानाः हनादिल ।
लिसें सिँया कलात्मक झ्याः व मञ्जुश्रीया मूर्ति नं लःल्हात ।
अभिनन्दन समारोहयात सम्बोधन यासें भारतीय राष्ट्रपति मुखर्जीं ऐतिहासिक व पवित्र शहर येँया भ्रमण यायेखनाः थः तसकं लयताःगु धयादिल । येँ राजनीतिक केन्द्र जक मखसें छगू आध्यामिक शहर तकं खःगु वय्कःया बिचाः खः ।
समारोहस प्रधानमन्त्री पुष्पकमल दाहाल, परराष्ट्रमन्त्री प्रकाश शरण महत, पर्यटन मन्त्री जीवनबहादुर शाही लिसेंया ब्वति दुगु खः ।
काठमाडौं विश्वविद्यालयपाखें मानार्थ विद्यावारीधि लःल्हात
नेपाल भ्रमणय् दीम्ह भारतया राष्ट्रपति प्रणव मुखर्जीयात थौं काठमाडौं विश्वविद्यालयं मानार्थ विद्यावारिधिया उपाधी लःल्हाःगु दु ।
विश्वविद्यालयं राजधानीया भद्रकालीस्थित आर्मी अफिसर्स क्लवय् विशेष दीक्षान्त समारोहया ग्वसाः ग्वयाः मुखर्जीयात विद्यावारिधिया उपाधी ब्यूगु खः । विश्वविद्यालयया कुलपति तकं खःम्ह प्रधानमन्त्री पुष्पकमल दाहालं वयकःयात मानार्थ विद्यावारिधि लःल्हानादीगु खः ।
काठमाडौं विश्वविद्यालयपाखें मानार्थ विद्यावारिधि चूलाःम्ह भारतीय राष्ट्रपति मुखर्जी स्वम्हम्ह मनू खः । थ्वयां न्ह्यः विश्वविद्यालयं संस्कृतिविद् सत्यमोहन जोशी व भारतीय बुद्धिजीवि करण सिंहयात मानार्थ विद्यावारिधिया उपाधी बीधुंकूगु दु ।
ज्याझ्वलय् शिक्षामन्त्री धनीराम पौडेल, सरकारया मेपिं मन्त्रीपिं, शिक्षा ख्यःलिसे सम्बन्धित उच्च पदस्थ मनूतयगु ब्वति दुगु खः ।
Categorized in राष्ट्रिय
