भिक्षु ज्ञाणपूर्णिकया शंखमुलय् अन्त्येष्टि
नृपेन्द्रलाल श्रेष्ठ | दिल्लाथ्व पुन्ही ११४०,असार २१ आइतवाः
मदुम्ह संघनायक भिक्षु ञाणपूर्णिक महास्थविरया वंगु आइतवाः शंखमुलय् अन्त्येष्टि याःगु दु ।
भिक्षु, भिक्षुणी, थीथी बौद्ध संघसंस्थाया प्रतिनिधिपिं लिसें सलंसः उपासक उपासिकापिनिगु दथुइ मदुम्ह भिक्षुया दाहसंस्कार याःगु खः । बौद्ध परम्पराकथं मरणानुस्मृति (मृत्यु स्मरण बोध याकीगु श्लोक) पाठ याय्धुंकाः स्थविरवाद बुद्धधर्मया परम्पराकथं दाहसंस्कार याःगु खः ।
कार्यवाहक संघनायक भिक्षु बोधिसेन महास्थविर, अखिल नेपाल भिक्षु महासंघया नायः भिक्षु मैत्री महास्थविर व भिक्षुणीपाखें ञाणवती गुरुमां नं मदुम्ह भिक्षुयात मि तयाबिज्याःगु खः । व लिपा हे सशस्त्र प्रहरीया छगू टुकडीं सलामी अर्पण याःगु खः । थ्व स्वयां न्ह्यः संघीय सांसद कृष्णगोपाल श्रेष्ठं सरकारया प्रतिनिधिकथिं भिक्षुया सीम्हय् राष्ट्रिय ध्वाँय् फाय्कादीगु खः ।
भिक्षु मदुगुलिं अपूरणीय क्षति
भिक्षु ञाणपूर्णिक महास्थविर मदुगुलिं बुद्धधर्म व नेपाःया छम्ह बौद्धिक व आध्यात्मिक ब्यक्तित्व तंकेमाःगु धयादिसें राष्ट्रपति विद्यादेवी भण्डारी, प्रधानमन्त्री केपी शर्मा ओलीं शोक प्वंकादिल । भिक्षु मदुगुलिं बुद्धधर्म व नेपाःया शान्ति स्थापनाय् ज्वःमदुगु क्षति जूगु शोक बक्तब्यय् न्ह्थनातःगु दु । वसपोल मदुगुलिं दुःख प्वंकादिसें म्यान्मार, थाइल्याण्ड, श्रीलंका सरकार व अनया संघसंस्थां शोक वक्तब्य छ्वया हःगु भिक्षु निग्रोधं जानकारी बियाबिज्यात ।
थ्व हे दथुइ अखिल नेपाल भिक्षु महासंघं छगू विज्ञप्ती पिथंसें नेपाःया स्थविरवाद बुद्धधर्मया पुनःजागरणय् आधुनिक शिक्षा प्राप्त याना बिज्याःम्ह भिक्षु ञाणपूर्णिक महास्थविर मदुगुलिं बौद्ध साहित्यया अनुवाद, अभिधम्मया ब्याख्या व बुद्धधर्मया विकासय् तःधंगु धक्का लाःगु न्ह्यथंगु दु । महासंघया महासचिव भिक्ष्ुा कौण्डन्य महास्थविरं पिथना बिज्याःगु उगु विज्ञप्तीइ वसपोलया त्याग, लगनशीलतापाखें सय्काः बुद्धधर्मया विकासया नितिं थप दायित्व वःगु नं न्ह्यथनातःगु दु ।
