प्रधानमन्त्री पुष्पकमल दाहालं दँदंनिसें विकराल समस्याकथं जुयाच्वंगु लोडसेडिङ्गयात चीकाः जनतायात राहत ब्यूगुलिं उर्जा मन्त्रालय व नेपाल विद्युत प्राधिकरणयात कयाः च्वछायादीगु दु । 

थोैं सोमावाः विद्युत चुहावट नियन्त्रण सम्बन्धी प्रधानमन्त्री ज्याकुथिइ ग्वसाः ग्वःगु समन्वयात्मक मुँज्यायात सम्बोधन यानादिसें प्रम दाहालं उकथं च्वछायादीगु खः । वय्कलं उर्जा मन्त्रालयं बांलाःगु ज्या यानाच्वंगु दुसां गुलिखे मनूतय्सं थुकियात सह याय्फयाच्वंगु मदु जुइ धयादीगु दु । सरकार दय्कूगु प्यला फुइधुंकाः नं मेमेगु मन्त्रालयं न्ह्यथनेबहःगु प्रगति क्यनेमफूगु धयादिसें प्रम दाहालं ततःधंगु ज्या छुं नं मजूगु धासें कुंखिनादिल ।

वय्कलं विद्युत चोरी नियन्त्रणया नितिं माःगु नियम कानून हिलेत सरकार तयार जूगु नं धयादीगु दु । सर्वसाधारण जनतां हुकिङ्ग यानाः मत खुयाच्वंगु व अरबपतिं मत खुयाच्वंगु विषययात छगू हे कथं मस्वयेत नं दाहालं प्राधिकरणयात इनाप यानादिल । वय्कलं जनतायात थुइकाः बानी भिंकेगु ज्या यायेमाःगु व अरबपतिया कानूनी कारवाहीया दायराय् हयेमाःगु खँय् बः बियादिल ।

Categorized in राजनीति