मदुम्ह विद्रोहि कविया अन्त्येष्टि क्वचाल
लहनान्यूज | थिंलागा त्रयोदशि ११३७ (डिसेम्बर २७ २०१६)
नेपालभाषा साहित्यय् विद्रोहि कवि धकाः म्हस्यूम्ह कवि लिसें पुलांम्ह सुभासद् बुद्ध सायमिया अन्त्येष्टि थौं येँया पशुपति आर्यघाटय् क्वचाल ।
मदुम्ह सायमियात वयकःया कायं मि तयादीगु खः । आइतबाः मदुम्ह सायमिया काय अमेरीकां म्हिगः नेपाः थ्यनेधुंकाः थौं अन्त्येष्टि याःगु खः ।
व स्वयां न्ह्यः मदुम्ह सायमियात थीथी राजनैतीक दलया नेता, नेपालभाषा ख्यःया साहित्यकार, न्ह्यलुवाःलिसें नं श्रद्धान्जलि देछाःगु खः । मदुम्ह सायमियात लिपांगु श्रद्धान्जलि देछायेत नेकपा एमालेया वरिष्ठ नेता लिसें पूर्व प्रधानमन्त्री माधवकुमार नेपाल, पूर्व उपप्रधानमन्त्री चित्रबहादुर केसी, पूर्वमन्त्री विश्वेन्द्र पासवान, संघीय समाजवादी फोरम नेपालया नायः उपेन्द्र यादव, ल्यू नायः राजेन्द्र श्रेष्ठलिसेंया नेतापिं पशुपति आर्यघाटय् थ्यंगु खः ।
लिसें नेवाः न्ह्यलुवा पद्मरत्न तुलाधर, नरेशबीर शाक्य, डा.महेशमान श्रेष्ठ, न्हूदँ राष्ट्रिय समारोह समितिया नायः लिसें सांसद भीमसेनदास प्रधान, उद्योगमन्त्री नवीन्द्रराज जोशी, तीर्थराम डंगोल, नेपाः राष्ट्रिय पार्टिपाखेंया सांसद् लक्ष्मण राजवंशी, नेरापाया मू छ्यान्जे डा.विजय सैंजुलिसें नं मदुम्ह सायमियात लिपांगु श्रद्धान्जलि देछाःगु खः ।
मदुम्हेसिया अन्त्येष्टि यायेत पशुपति आर्यघाटय् यंके न्ह्यः वयकःया सीम्ह येँया न्हूसतकय् भूगोल पार्कय् तःगु खः । लिपांगु श्रद्धान्जलि देछायेत सायमिया सीम्ह सुथय् १०ताः इलंनिसें १२ताः ईतक्क भूगोल पार्कय् तयेधुंकाः पशुपति आर्यघाटय् सिथं यंकूगु खः ।
येँया न्हू सतक वंगः, जनबहाः, असं, कःमिलाक्षी जमः जुयाः पशुपति आर्यघाटय् सायमिया सीम्ह सिथं यंकूगु खः ।
७२दँ दुम्ह सायमि वंगु आइतबाः यलया अल्का अस्पतालय् वासः याकेगु झ्वलय् मदुगु खः । मदुम्ह सायमिया नेपालभाषा साहित्य ख्यलय् सलंसः चिनाखँ लिर्से ‘जि व जिगु वर्तमान’ ‘जिन्दगी : बँय् वाःगु हि, चेतनाया मि’ लिसेंया सफू पिहां वःगु दु ।
संसदय् समावेशी विधेयकया माग यासें सायमिं लछितक यानादीगु विरोध प्रदर्शन नेवाः आन्दोलनया ख्यलय् ल्वःमंके मफइगु विषय खः । सायमिया जहान लिसें छम्ह म्ह्याय् व छम्ह काय् दी ।
Categorized in राष्ट्रिय
