मन्त्रीयानितिं छगू पाठ
जुमुमान महर्जन
कैलाली जिल्लाया टिकापुरय् जूगु डल्फिन महोत्सव क्वचाय् काः हनेबहःम्ह संस्कृति, पर्यटन तथा नागरिक उड्डयन मन्त्री योगेश भट्टराई नेपालगञ्जपाखें येँ लिहां वय्त्यंगु इलय् जूगु घटना थौंकन्हय् तसकं चर्चाय् वयाच्वंगु दु । विशेष यानाः माननीय मन्त्रीजुयात जहाजया यात्रुतसें याःगु दुव्र्यवहारयात कयाः कया तःगु भिडियो भाइरल थें जुयाच्वंगु दुसा थुकियात कयाः थीथी मनूतसें थीथी कथं बिचाः प्वंका हयाच्वंगु खनेदु ।
संस्कृति, पर्यटन तथानागरिक उड्डयन मन्त्री भट्टराई ज्याझ्वः क्वचाय्काः बुद्ध एअरपाखें येँ लिहांवय्गु ज्याझ्वः दुगु खः । वय्कः येँ लिहां हे वय्माःगु मेगु कारण धइगु कन्हय् कुन्हु प्रतिनिधिसभाय् माननीय सांसदपिन्सं न्यंगु न्ह्यसःया लिसः बीमाःगुलिं खः । सायद थ्व हे हुनिं मन्त्री भचा लिबाक्क हे जूसां येँय् वय्गु तयारी दुगु जुइमाः । तर थःगु ज्याझ्वःया ईया सायद ख्याल (बाध्यता) मयाःगुलिं हे वय्कलं अपमान जन्य ब्यवहार फय् माःगु अवस्था ब्वलन । थ्व स्वय्बलय् सामान्य घटना जूसां थुकिं हनेबहःपिंनिगु नितिं छगू तःधंगु अले बांमलाःगु घटना खः धकाः धाय्फु । थुकिया भिडियो सामाजिक सञ्जालय् नं बय्बय् जुयाच्वंगु दु ।
सामान्यत हवाई जहाज इलय् हे ब्वय् माःगु खः । थीथी कारण गथे कि इञ्जिनया गडबडी वा मौसमया गडबडीया हुनिं बाहेक जहाज इलय् हे ब्वइगु खः । तर नेपाःया सन्दर्भय् धाःसा थीथी कारण क्यंसें विमान इलय् मब्वइगु सामान्य हे जुइ धुंकल । थुकियात कयाः यक्वस्यां कुंखिने धुंकूगु दुसा थुकियात कयाः सम्बन्धित निकायं धाःसा खास हे वास्ता यानाच्वंगु मदु । झीसं स्यू कि विमानपाखें यात्रा अप्वः मनूत धइगु थःगु ई व आकस्मिक ज्याया हुनिं याइपिं जुयाच्वनी ।
थजाःगु इलय् विमान ‘डिले’ जुइबलय् सामान्य मनूत आक्रोशित जुइगु स्वभाविक खः । थ्व हे झ्वलय् छम्ह मन्त्रीया ज्याझ्वःया हुनिं चाहे १५गू मिनेट हे छाय् मज्ुइमाः वा १घौ, सर्वसाधारणया ई सितिं वंगु धइगु सामान्य ताय्के मज्यू । अले विमानया आधिकारिक संस्थापाखें नं भिआइपी मनूतय्गु सम्मान (चाकडी ?)या हुनिं थजाःगु ज्या याय्गु धइगु नं पाय्छि मखु धइगु खँ नेपालगञ्जं येँ ब्वइगु बुद्ध एअरय् जूगु घटनां नं क्यंगु दु । थुकिया सरोकार धइगु छुं नं वादीलिसे सम्बन्धित धकाः द्वपं बीगु नं पाय्छि मजू ।
दकलय् न्हापां ई धइगु सर्वसाधारण व भिआइपीयानितिं गबलें फरक जुइमखु । तर झीगु देसय् धाःसा भिआइपिं सवारी जुइगु ई जुल कि व सतकय् हे जुइमा वा सर्गतय् जुइमाः थुकियात बिचाः याइमखु, घण्टौं ईतक नं सर्गतय् वा सतकय् वानिथाय् नं ट्राफिक जाम जुयाच्वनी । थ्व यक्वस्यां फयाच्वंगु घटना खः । तर ई न्ह्याबलें छगू हे जुइमखु धइगु खँ नेपालगञ्जय् माननीय मन्त्रीयात जूगु व्यवहार (दुव्र्यहार) यात नं काय्फु ।
थजाःगु व्यवहार जुल धकाः मन्त्रीं नकारात्मक कथं बिचाः मयासें थुकियात दुवालाः स्वय् माःगु दु, अले जनतात नं न्ह्याग्गु अवस्थाय् सुम्क च्वनाच्वनी मखु धइगु बिचाः यायेमाः । यदि थजाःगु घटना जूगु खःसा मेमेगु देसय् मन्त्रीपाखें राजीनामा हे ब्यूगु तकं दसु दु । मेक्सिकोय् छम्ह मन्त्री थः लिबाःगु हुनिं जहाज ३७गू मिनेट डिले याय् माःगुलिं राजीनामा तकं ब्यूगु झी सकस्यां स्यूगु खः ।
जहाजय् मन्त्रीयात गुकथं व्यवहार वा विरोध जुल, व खास हे बांलाःगु मखुसां सर्वसाधारण जनतां थःत जूगु समस्या प्वंकेगु धइगु जनताया नैसर्गिक अधिकार नं खः । थ्व सुनां याःगु धइगु खँ स्वयां नं उगु परिस्थितिइ सर्वसाधारण मनूतय्गु मानसिकताग जाःगु जुयाच्वंगु दु धइगु सीकेमाः । सर्वसाधारण जनताया समस्या थुइकेगु स्वयां उमित हे समस्याय् लाकीगु ज्या अले जनताया नैसर्गिक अधिकारयात वाःचाय्काःमन्त्रीलिसें उच्चपदयाब्यक्तिपिन्सं थःगु व्यवहारय् सुधार महलधाःसाथुकियालिच्वःअझभयावह नं जुइफु ।
