महानगरपालिकां आः स्वंगु केन्द्रपाखें परीक्षण सेवा बिइगु
लहानान्युज | कछलाथ्व द्धादशी ११४१,जेष्ठ ९ आईतवाः
कोविड संक्रमणया लक्षण खनेदुपिं वा शकां दुपिं मनुपिन्त याइगु पोलिमेयर चेन रियाक्सन (पीसीआर) परीक्षणया नितिं येँ महानगरपालिकां न्हूगु तालिका सार्वजनिक याःगु दु ।
गुकिइ आः हरेक दिं सुथसिया ११ ताः निसें स्वंगू तक्क केन्द्रपाखें परीक्षण याइगु जूगु दु । थ्वयांन्ह्यः छगू केन्द्रपाखें जक सेवा विस्तार जुयाच्वंगुलिइ आवालिं स्वंगू केन्द्रपाखें पीसीआर परीक्षण यायेगु सेवा न्ह्याकूगु दु । अथेहे गुगुनं वडाय् परीक्षण याइपिनिगुः माग अप्वःल धाःसा उगु थासय् नं परीक्षण यायेगु महानगरं न्ह्यथंगु दु ।
न्हूगु धलःकथं आइतबाः २९ वडाया वडावासीपिं पद्मकन्या स्कूल डिल्लीबजार परीक्षण यायेफइ, अथेहे वडा ४ या वडावासीपिं विशाल मिलन केन्द्रय् वना परीक्षण यायेफइ ।
अथेहे सोमबाः वडा १६ या वासीपिं वहुउद्देश्यीय मार्सल आर्ट केन्द्र (जुडो हल), वडा २० या वासीपिं शान्ति निकुञ्ज विद्यालय व वडा ३२या वासीपिं वडा ज्याकूया परिसरय् वना परीक्षण यायेत इनाप याःगु दु ।
मंगलबार वडा ८, बजबागेश्वरी, १४ कलंकी व २६ लैनचौर ज्याकुया परिसरय्, बुधबाः मीनभवनया ट्रलीबस परिसरय् व वडा १५ या भुइँखेलय् परीक्षण जुई, विहीबाः बसन्तपुर व महावौद्धय् लिसें शुक्रबाः वडा ३ ज्याकुया परिसर महाराजगञ्ज व वडा ६ ज्याकू परिसर बौद्धय् परीक्षण जुइगु धलः सार्वजनिक याःगु दु ।
परीक्षण याये न्ह्यः सम्बन्धित वडाया क्लिनिक इन्चार्जलिसे स्वापू तया म्हासुगु फारमय् प्रारम्भिक विवरण भरेयायेत नं इनाप याःगु दु । महानगरया पीसीआर ज्याझ्वः संयोजक ऋषिप्रसाद भुषालं धयादि ‘अनलाइनय् तथ्याङ्क तयेवं छगू कोड वई उगु हे कोड फारमय् तया आइएमयु प्रक्रिया पूवनि । थ्व विवरण अनिवार्य खः ।”
