महासंघया न्हूम्ह नायः मोहन सुनार
नेपाल सुनचाँदि व्यवसायी महासंघया निक्वःगु महाधिवेशनं तनहुँया मोहन सुनारयात महासंघया न्हूम्ह नायः ल्यःगु दु ।
 
थौं येँय् क्वचाःगु महासंघया प्यक्वःगु दँमुँज्या व निक्वःगु महाधिवेशनं सुनारया नेतृत्वय् २८म्ह  दुजःया न्हूगु कार्यसमिति निर्विरोध चयन याःगु खः । महासंघया न्हूगु कार्यसमितिइ मू छ्यान्जे धर्मसुन्दर बज्राचार्ययात ल्यःगु दु ।
 
नायः पदय् ल्यःगु लिसें महासंघया न्हूम्ह नायः मोहनकुमार सुनारं लहनान्यूजलिसे खँ ल्हासें महासंघयात अझ बल्लाक, अझ धिसिलाक्क न्ह्यःने यंकेगु नितिं थम्हं पलाः न्ह्याकेगु धयादिल । पुलांगु नेतृत्वं न्ह्यःने यंकाच्वंगु ज्यायात हे अझ सशक्त रुपं निरन्तरता बीगु वयकःया धापू खः ।
 
सुनारं न्हापा हे दयाच्वंगु चोरीजन्य समस्या, कच्चा ज्वलंया समस्या, निर्देशिका जारी मजुयाच्वंगु समस्या आदिया समाधान यायेगु नितिं थम्हं थम्हं राज्यया थीथी तगिमय् माःकथं सहलह व वहसयात तच्वयेकेगु धयादिल । लिसें वयकलं लुँवहः, तिसा व्यवसाय ख्यलय् छगू जक महासंघ जुल धाःसा सशक्त रुपं वनेफइगु धासें नेपाल सुनचाँदि, रत्न तथा आभूषण महासंघलिसे कार्यगत एकता जक मखु, संस्थागत एकता हे यायेगु नितिं पहल यायेगु नं धयादिल । 
 
न्हूगु कार्यसमितिइ न्वकू पदय् न्याम्हेसित ल्यःगु दुसा छ्यान्जे, दांभरिं व ल्यू दांभरिं पदय् छम्ह छम्हेसित निर्विरोध ल्यल । व हे कथं जिल्ला दुजः कथं १४, नगर दुजः अन्तर्गत ३ व एशोसिएट्स दुजः कथं छम्हेसित ल्यल ।
 
 
व स्वयां न्ह्यः महाधिवेशनया उलेज्या ज्याझ्वलय् उपप्रधान लिसें गृहमन्त्री विमलेन्द्र निधिं व्यापारीं राजश्व व कानुन छले याइगु व सरकारं पायछि कानुन दयेकामब्यूगु धकाः निखें कुंखिना दुगु अवस्थाय् निगुलिं पक्षपाखें अध्ययन यानाः समाधानया लागिं जायेमाःगु धयादीगु खः ।
 
अथे हे सभां महासंघया तत्कालीन मू छ्यान्जे दियेशरत्न शाक्यं न्ह्यब्वयादीगु वार्षिक प्रतिवेदन व तत्कालीन दांभरिं ज्ञानकाजी शाक्यं न्ह्यब्वयादीगु आर्थिक प्रतिवेदन नं पारीत याःगु खः ।
 
लिसें थौंया हे सभां महासंघया विधानय् माःकथं संशोधन यायेगु नितिं विधान संशोधन संकल्प प्रस्ताव पारीत याःगु दु । आः विधान संशोधन यायेधुंकाः विशेष साधारण सभा यानाः न्हूगु कार्यसमितिइ माःकथं व सहमति जूकथं थीथी पदय् दुजःत थप जुइगु धाःगु दु ।