मांभाय् पत्रकारिता विकासय् विद्यासुन्दरया पलाः
– नृपेन्द्रलाल श्रेष्ठ
मंसीर २९ गते । येँ महानगरपालिकाया नितिं छगू महत्वपूर्ण दिं । येँ महानगरपालिका घोषणा जूगु दिंकथं थुगु दिंयात येँ महानगरपालिकां दँय्दसं महानगर दिवसकथं हनावःगु दु । थुगुसिया महानगर दिवस विशेष हे जुल । छगू ला थुगुसी २५क्वःगु महानगर दिवस जुल । महानगरया रजत जयन्ति जूगु ल्याखं नं थुगुसिया दिवस विशेष जूगु जुल । उकिया नापं करदातातय्त सम्मान, कर्मचारीयात दीर्घसेवा पदकलिसें परम्परागत बाजंगुरुपिन्त सम्मान, पत्रकारतय्त सुशासन पत्रकारिता सिरपाःलिसें महानगर दिवस नापं महानगर महोत्सव हे जूबलय् नं झन् विशेष दय्का बिल ।
थुगुसि महानगर दिवसया झ्वलय् याःगु सम्मानय् निगू विशेषकथं न्ह्यथनेलिसें च्वछाय्बहःजू । येँ महानगरपालिकाया प्रमुख विद्यासुन्दर शाक्यपाखें २५क्वःगु महानगर दिवसया लसताय् परम्परागत ज्यापु समुदायया ६३गू त्वाः गुरु, नायः समुदायया ६०गू त्वाः गुरु व गुंला बाजंया ३०गू बाजं गुरुपिं नाप थुगुसिनिसे यँयाः इलय् पिहां वइगु दीप्याखं, सवः द्यः, पुलिकिसि व लाखे आजुया बाजं गुरुपिन्त हन । सकल बाजं गुरुपिन्त बसन्तपुली मुंकाः हनापौ व २५द्वः तकालिसें सकलसिगु सम्मान जूबलय् व लू स्वय्बलय् धात्थें हे न्ह्यइपुस्से च्वं ।
परम्परागत संस्कृति, सम्पदा संरक्षणया झ्वलय् थ्व च्वछाय्बहःगु पलाः धाय् हे माः । थन गुलिखे बाजं संस्कृति तना वनेधुंकल । आर्थिक अभाव, ल्याय्म्ह पुस्तायात परम्परागत तजिलजिइ आकर्षित याय्मफूगु थजाःगु थीथी समस्या बाजं परम्पराय् खने दयाच्वंगु दु । येँ महानगरपाखें बाजं गुरुपिन्त ब्यूगु सम्मानं परम्परागत बाजं स्यनाकयाः, सय्काः छु फाइदा जुइ धाइपिन्त छगू लिसः ला वःगु द हे दुु । लिसें न्हना वनेत्यंगु व नेवाः तजिलजिइ मदय्कं मगाःगु आर्थिक अभावं यानाः न्ह्याके मफयाच्वंगु बाजं परम्पराया निरन्तरताय् नं ग्वाहालि जुइ । उलि जक
मखु, दिना हे वनेधुंकूगु परम्परायात म्वाकेगु नितिं च्यूताः दय्का बी । निराशा अप्वयावंगु थासय् आशाया जः च्याकाब्यूगु दु, थुगु सम्मानं ।
२५क्वःगु महानगर दिवसया झ्वलय् मेगु च्वछाय्बहःगु ज्या धइगु पत्रकारिता सिरपाः नं खः । महानगर बिटय् ज्या यानाच्वंपिं, महानगरया गतिविधि, महानगरया समाचार कःघाय्त योगदान बियाच्वंपिं झिम्ह पत्रकारतय्त सुशासन पत्रकारिता सिरपालं सम्मान यात । खतुं न्हापा कर्मचारीतय्सं महानगर दिवस हनेगु यानाच्वंबलय् नं थुगु सम्मान मब्यूगु मखु । तर आः विद्यासुन्दर शाक्य प्रमुखय् निर्वाचित जुयावय् धुंकाः थ्व सम्मानया महत्व झीगु नितिं थहांवंगु दु ।
थुगुसी च्याम्ह पत्रकार व निगू संचार गृह यानाः झिगू सुशासन पत्रकारिता सिरपाः लःल्हात । आः वयाः थुगु सिरपाःया छगू बांलाःगु पक्ष छु जुयाबिल धाय्बलय् झिगू सिरपाः मध्य् स्वंगू नेवाः संचार ख्यःया नितिं हे फ्यानाब्यूगु दु । नेपालभाषां पत्रकारिता यानाच्वंपिं निम्ह पत्रकार व छगू नेवाः सञ्चार गृहयात सुशासन पत्रकारिता सिरपाः लःल्हात ।
हनापौलिसें न्यय्द्वः तकाया सुशासन पत्रकारिता सिरपालं थुगुसि नेवाः संचार गृहकथं नेवाः अनलाइन न्यूज, झीगु डट कमपाखें रेखा शाक्य व लहना वाःपौपाखें नृपेन्द्रलाल श्रेष्ठयात थुगु सिरपाः बिल । आः मेमेगु दँय् मेमेपिं नेपालभाषां पत्रकारिता यानाच्वंपिं पत्रकार व नेवाः संचार गृह थुगु सम्मानं सम्मानित जुजुं वनी । थ्व मातृभाषा पत्रकारिता ख्यःया नितिं अथवा नेवाः पत्रकारिता ख्यःया नितिं तःधंगु हःपाःया विषय जूगु दु ।
थौंया इलय् देय्न्यंक धइथें बजाः दय्काः, तःधंगु क्षेत्रय् वने फयाच्वंगु खस भाषाया पत्रकारिता क्षेत्रं हे नं समस्या फयाच्वंगु दु । खस भाषां हे पत्रकारिता याय्त थाकुयाच्वंगु इलय् नेपालभाषां पत्रकारिता ला झन् हे तःधंगु हाथ्यालं जाःगु विषय खः । आःया परिवेशय् स्वय्गु खःसा नेपालभाषा पत्रकारिता धइगु व्यावसायिक पत्रकारिता मजूसें छगू रहर वा भाषाप्रति छुं याय् धइगु भावना, भाषिक अनुराग जक जुयाच्वंगु दु । थजाःगु अवस्थाय् विद्यासुन्दर शाक्य थः हे नेवाः पत्रकारिता क्षेत्रया समस्या थूम्ह व थः हे फयावःम्ह जूगु ल्याखं नं खय्माः, वय्कलं नेवाः
सञ्चारख्यःया नितिं बिचाः जक याःगु मखसें, पलाः हे न्ह्याकल ।
येँ महानगरपालिका प्रमुख विद्यासुन्दर शाक्य थः हे नं पत्रकारिता यानावःम्ह, अझ नेपालभाषा पत्रकारिताय् मन क्वसाःम्ह खः । न्हापा वय्कलं नेपालभाषाया न्हिपौ विश्वभूमि पत्रिकाय् लगानी हे यानाः ज्या यानादीगु दु । विश्वभूमि न्हिपौ छुं दँ पिहांवयाः लिपा दिनावन । व ल्याखं नं विद्यासुन्दर शाक्य थःम्हं नं स्यूगु हे जुल नेपालभाषा अथवा मातृभाषा पत्रकारिता गुलितक्क थाकूगु ज्या खः धकाः । व हे कारणं नं जुइमाः, झिगू सिरपाः मध्ये स्वंगू सिरपाः नेपालभाषा पत्रकारिताया नितिं हे धकाः फ्यानाः हःपाः बीगु ज्या विद्यासुन्दरपाखें जुल । थुगु सिरपालं यानाः
नेपालभाषां पत्रकारिता यानाच्वंपिं पत्रकारतय् मनोबल थहांवयाः थःगु समुदायप्रति उत्तरदायित्व बोध यानाः अझ प्रभावकारी ढङ्गं च्वसा न्ह्याकेत उत्साहित याइ ।
थनथाय् निदँ न्ह्यः नेवाः पत्रकार राष्ट्रिय दबूपाखें न्हापांगु मातृभाषा पत्रकारिताया राष्ट्रिय सम्मेलन जूगु नं लुमंकेबहःजू । उगु सम्मेलनं यानाः नेपालय् मातृभाषा माध्यमं पत्रकारिता यानाच्वंपिं सकलें छथाय् मुनेगु, सहलह ब्याकेगु लकस दय्कल । उगु इलय् व सम्मेलन नं येँ महानगरपालिकाया हे ग्वाहालिं जूगु खः । नेवाः पत्रकारतय्त माःगु इलय् ग्वाहालि बीगु नितिं धकाः पत्रकार दबुलिइ अक्षय कोष दय्केगु ज्या जुल । उगु अक्षय कोषया नितिं नं येँ महानगरपाखें न्यागू लख तकाया ग्वाहालि जुल । थुकिं नं नेवाः सञ्चार क्षेत्र, नेवाः पत्रकारिता क्षेत्रया नितिं विद्यासुन्दर शाक्यया नुगः गुलि क्वसाः धइगु प्रमाणित यानाबिल ।
महानगर दिवस न्हापा कर्मचारीतय्गु पालय् नं मजूगु मखु, तर थथे प्रचारप्रसार व तःजिक मजू । येँ महानगरपालिकाय् विद्यासुन्दर शाक्य निर्वाचित जुयावय्धुंकाः वंगु दँनिसें परम्परागत बाजं गुरुपिन्त नीन्याद्वः तका व हनापौलिसें स्थानीय सरकारपाखें सम्मानित याय्गु ज्या तसकं च्वछाय्बहःगु ज्या जूगु दु । आःतक सत्ताय् थ्यंपिं न्ह्याम्ह हे स्वःसां थासय् थ्यन कि भाषा व समुदाययात स्वाहाने दय्कीपिं जक हे खनेदत ।
लिपा भाषा, समुदाय, थाय्गाः सकतां ल्वःमंका हे छ्वल । तर विद्यासुन्दर शाक्य थः महानगर प्रमुख जुइधुंकाः नं भाषा, समुदायप्रति जिम्मेवारी कयाः न्ह्याःवन । परम्परागत बाजं गुरुयात सम्मान, मातृभाषा पत्रकारिता यानाच्वंपिं पत्रकार व सञ्चार गृहयात सम्मान थुकिया दसु जुयाब्यूगु दु ।
