२०८० चैत्र १६, शुक्रबार

मातृभाषाया पत्रकारिता सम्मेलनया अन्तिम तयारी

लहनान्युज | बछलागा औसी ११३८ (मे १५ २०१८)

नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूया ग्वसालय् नेपाल आदिवासी जनजाति पत्रकार महासंघ फोनिजया संयोजनय् थ्व हे जेष्ठ २ गते जुइगु मातृभाषा पत्रकारिता सम्मेलवनया अन्तिम तयारीइ थ्यंगु दु । 
 
 
संघीय संरचनाय् सञ्चार, मातृभाषा पत्रकारिताया आधार धइगु मू नारा बिया नेपाल पर्यटन बोर्डया हलय् जुइगु उगु सम्मेलनया उद्घाटन समारोहया मूपाहां सूचना तथा संचार प्रविधि राज्यमन्त्री गोकुल बाँस्कोटा जुयादीगु अले नेपाल पत्रकार महासंघ, प्रेस काउन्सील नेपाल, फोजिन लगायतया प्रनिनिधिपिं पाहां जुयादीगु धकाः नेवाः पत्रकार राष्ट्रिय दबूया नायः श्रीकृष्ण महर्जनं धयादीगु दु ।
 
 
नेपाःया संचार जगतय् समावेशीताया खँ ल्हायेबलय् नीति निर्माणय् समावेशीता, जनशक्तिइ समावेशीता, विषय वस्तुइ समावेशीताया जक खँ वयाच्वंगु अवस्थाय् भाषिक समावेशीता नं दुथ्यायेमाः धकाः सन्देश बिइत नापं धर्मादित्य धर्माचार्ययात जनजातिया न्हापां मातृभाषाया पत्रकारया रुपय् स्थपित यायेत अले सकलसिन स्वीकार याकेत नं थुगु कथंया सम्मेलन याये त्यनागु खः धकाः नायः महर्जनं धयादिल ।
 
 
वय्कलं नेपाः संघीय संरचनाय् वने धुंकूगु अवस्थाय् आः प्रदेश स्तरीय गुलि नं संचास गृहत संचालन याइ इमित अनया प्रदेशया मातृभाषायात नं थाय् बिइगु कथंया नीति निर्माण यायेत राज्ययात माःगु कथं दबाव बिइत नापं मातृभाषा पत्रकारिताया विकास यायेत नं थुगु कथंया सम्मेलन याये त्यनागु खः धकाः नेवाः पत्रकार राष्ट्रिय दबूया नायः श्रीकृष्ण महर्जनं धयादिल ।
 
 
उगु सम्मेलनय् नेवाः, तामाङ, राई, लिम्बु, शेर्पा, थारु, गुरुङ व मगर पत्रकार संगठनपाखें आधिकारीक रुपं थःपिनिगु मातृभाषाया पत्रकारिताया इतिहासंनिसें वर्तमान तक अले समस्या व समाधानयात तकं दुथ्याका ज्यापौ न्ह्यब्वयादीगु ज्याझ्वः दु ।
 
 
अथे हे मेमेगु मातृभाषाया पत्रकारिता याना वयाच्वनादीपिन्सं नं लिखित रुपं हे थःथःपिनिगु इतिहास ज्वना वइगु अले सहलह ब्याका छगू घोषणा पत्र तकं जारी यायेगु जुइ धकाः नेवाः पत्रकार राष्ट्रिय दबुलिं धाःगु दु । लिपा अन वःगु ज्यापौयात कया अझ थप याना सफूया रुपय् तकं पिकायेगु जुइ धाःगु दु ।
 
 
थौंकन्हय् नेपाःया आदिवासी जनजातिया ५९ गू जातीया सुचिकृत जुयाच्वंगु दुसा इपिं मध्ये पत्रकारतय्गु संगठन हे दयेकातःगु च्यागू जाती नापं मातृभाषां पत्रकारिता यानाच्वंपिं किसान, चेपाङ, थामी, दराई, बरामो, माझी, कुमाल, जिरेल, डोल्पो, ताजपुरीया, दुनवार, धिमाल, मेचे, राजवंशी, ल्होमी व सुनवार दु ।
 
 
इपिं फुक्क जनजातिया पत्रकारत थुगु मातृभाषा पत्रकारिता सम्मेलनय् ब्वति कयादी धकाः नेवाः पत्रकार राष्ट्रिय दबुलिं धाःगु दु ।
 
 
मातृभाषा पत्रकारिता सम्मेलनया तायारीय झ्वलय् फोनिजया केन्द्रीय पदाधिकारी, मातृभाषां पत्रकारिता यानाच्वंपिं पत्रकारतलिसे, च्यागू जातीय पत्रकार संगठनलिसे नापं नेवाः पत्रकार राष्ट्रिय दबूया येँ, यल, ख्वपया जिल्ला पदाधिकारीपिंलिसें ब्यागलं ब्यागलं कथंया बैठक च्वना नेवाः पत्रकार राष्ट्रिय दबूपाखें माःगु तयारी याःगु दु ।  
 
 
थुगु ज्याझ्व प्रत्यक्ष प्रसारणयात रेडियो उपत्यका एफ एम ८७.६ मेगाहर्ज, नेवाः एफ एम १०६.६ मेगाहर्ज नाप नेवाः अनलाइनन्युज डट कम, नेपालभाषा टाइम्स डट कम, लहनान्युज डट कम व नेवाः डट कमपाखें जुइगु दु ।
 
Categorized in राष्ट्रिय