मिजंसू
- अन्जुराज
थौं शनिबाः वसः ह्युह्युं हे १० बजे जुइधुंकल । जा थुइ हे मानि, मनय् खँ वायेकु वायेकुं ल्हाः च्वयेका च्वन मतिनां । उगु इलय् हे वया भाःतम्ह कःसिइ थाहां वल ।
‘ग्व ? जा नयेगु सुरसार मजूनिला ?’ नये मास्ति वयेधुंकल ।
‘सिधल पलख लँ च्वनादिसँ ले । मत वलकि राइसकुकर अन जुइनि । बरु स्विच अन जुयाच्वंगु खः मखु छकः स्वयादिसँ ।’
‘छंके ला भ्याः भतिचा हे बुद्धि मदु’ – वया भाःतं छक्कलं हालाहल । ‘गुलि जक हाकिम जुइ न्ह्यांम्ह मिसा थ्व ? जि ला गजप हे जुया का । छु आः जिं नं जा थुइगु याये मालका मखुला ?’
लिसलय् वं छु नं न्वंवाइमखु । न्ह्याबलें नं थ्व हे जक गनगन छाय् खः थथे हेस्यानाः जक हे खँ ल्हाइगु वयात । न्ह्याबलें वयात क्वात्तु क्वाइगु । ‘साप मिजं जुयाः खँल्हायेमाः ।’ मतिनां छुं लिसः मब्यूसे सुंक भुतुकोथाय् वनाः थरमसय् च्वंगु च्या छगू हयाः
भाःतम्हेसित बिल ।
‘कन्हय् पारेन्ट्स मीटिङ दु । लसताया स्कूलय् ११ बजे ।’ वं जानकारी बिल थः भाःतयात ।
‘छ हे हुँ, जि वने म्हाः’ – भातम्हं लिसः बिल ।
‘जि वने लाइमखु जुइ, कन्हय् अफिसं पिहांवये मिलेजुइ मखु जुइ ।’
‘अफिस तःधं कि छंगु पारिवारिक जिम्मेवारी ?’ – वया भाःत छक्कलं च्याठे जुयाः हालाहल ।
‘छि ला न्हिच्छि छेँय् खःनि कन्हय्, अफिस वनेमाःगु ला मखु नि । बिदा कयागु मखुला ?’ – मतिनाया सः नं तःसः जुल ।
‘जि छाय् वनेगु ? छं बुइकूम्ह मचा खः, छ हे हुँ, जिं धाःगु खँ छं न्यने हे माः । मखुसा राजिनामा ब्यु अफिसय्, सुयां मदुगु सुनां नं मनःगु जागिर थें – भाःतम्हं निर्णय याये थें न्यंकल ।
‘राजिनामा बियां छु नयेगु ले ? छि छम्हेसिगु जागिरं छु यायेत गाः धकाः ! मतिनायात न तं पिहांवल । थःथवं ग्वाहालि दुसा का न्ह्यागुं ज्या याये अःपुइ ।’
‘छं जागिर दु धकाः जितः हेपे यानागु का मखुला?’ – भाःतम्हेसिया सः झन तःसः जुल ।
‘का स्व खँ गनं गन थ्यन’ – मतिना दिक्क चाल । थ्व मिजंसू गुबले जक थ्व मिजनं त्वःतीगु जुइ धाधां वसः हिइगु ज्या दिकाः भुतूकोथापाखे वन ।
